Саха сиригэр инфекционнайа суох ыарыылары сэрэтии күннэрэ ыытыллаллар

80 саастаах Анатолий Копылов регионнааҕы эндокринология киинигэр эмтэниини бара сылдьар. Анатолий Тимофеевичка 25 сыл аннараа өттүгэр сахарнай диабет диагноһын туруорбуттара. Ол кэмтэн ыла кини доруобуйатын туругун илиитигэр ылан, саахарын кэтэнэн, чэгиэн сылдьар туһугар күннэтэ үлэлэһэр. Бу кииҥҥэ киирбитэ 4 хонуга, манна сытан эрэн туһааннаах процедура ылан, ону тэҥэ сахарнай диабет оскуолатын ааһабын диэн кэпсиир.

Анатолий Копылов, Дьокуускай олохтооҕо: «Сахарнай диабекка быраастар эппиттэрин барытын тутуһуохха наада. Сүрүнэ – аһылыккын көрүөххун наада уонна физическэй ноҕурууска наада».

Бүгүҥҥү күҥҥэ Саха сирин үрдүнэн 30 тыһыынча кэриҥэ киһи сахарнай диабетынан ыалдьан учуокка турар. Дьиҥэ бу көрдөрүү хас да төгүл кыра буолуон сөп. Тоҕо диэтэр бу ыарыы өр кэмҥэ биллэрбэтинэн сылдьар. Эндкринологтар этэллэринэн сахарнай диабетынан сүрүннэн үлэлиир кыахтаах 60 саастарыгар диэри дьон ыалдьар. Регионнааҕы эндокринология киинэ ааспыт сылга бүтүн дойдутааҕы диабеты утары охсуһуу  бырайыак чэрчитинэн эрдэ клиническай балыыһаҕа баар диспансер базатыгар аһыллыбыта.

Татьяна Матвеева, эндокринологическай киин эндокринолог бырааһа: «Биһиги эрэгийиэннээҕи эндокринологическай кииҥҥэ доруобуйа оскуолатын сахарнай диабеттаах дьоннорго ыытабыт. Туох ыарахаттар үөскүүллэрин онтон хайдах харыстаныахха сөбүн. Бэйэ ыйааһыны көрүнүү, аһааһын, эмтэнии туһунан кэпсиибит».

Манна күҥҥэ 5 эндокринолог быраас ортотунан 60-70 киһини көрөр. Дьокуускайтан эрэ буобакка, улуустартан направлениянан ананан кэлэн көрдөрүнэллэр. Бу нэдиэлэҕэ өрөспүүбүлүкэ үрдүнэн инфекционнайа суох ыарыылары сэрэтии нэдиэлэтэ ыытыллар. Ол чэрчитинэн хас биирдии киһи хайаан даҕаны сылга саахарын көрдөөрүүтүн булгуччу билэрэ ирдэнэр. 

София Семёнова, эндокринологическай киин сэбиэдиссэйэ: «Если есть повышенный уровень сахара в крови, то обязательно нужно пройти обследование на выявление этого заболевания, либо это может быть состояние – предиабет. Сейчас, к сожалению, мы стали регистрировать очень много таких состояний».

Маннык предиабет туруктаах дьон биллэ элбээбитэ бэлиэтэнэр. Онон кутталлаах чуумпу ыарыыны кэмигэр диагностанан, кэтэнэн чөл туруктаах өр сылларга олоруохха сөп диэн эмчиттэр бэлиэтииллэр.