Доруобуйаларыгар хааччахтаах дьон чэпчэки атлектика көрүҥнэригэр күрэхтэстилэр

Бүлүү улууһуттан сылдьар Илья Павлов бэйэтэ чэпчэки атлетикаҕа тренерын таһынан, күрэхтэһиигэ бэйэтэ эмиэ кыттар. 200 уонна 400 миэтэрэ дистанцияҕа сүүрүөхтээх. Кэнники сылларга улууспутугар адаптивнай спорт сэргэхсийэн, кыттыан баҕалаах ахсаана биллэ элбээтин  кэпсиир. Бу күрэхтэһиигэ бэлэмнэнэн уопсайа 7 буолан кэлэн ситиһиилээхтик кытта сылдьаллар.

Илья Павлов, тренер, күрэхтэһии кыттыылааҕа: "Бүлүү улууһуттан 7 киһилээх хамаанда кэлэн кытта сылдьабыт. Көрдөрүүбүт үчүгэй. Икки чемпионнаахпыт уонна биир мөккүөрдээх түгэн баар, боротокуол таҕыстаҕына ол быһаарыллыа".

Чэпчэки атлетикаҕа доруобуйаларыгар хааччахтаах дьон ортотугар Саха сирин чемпионатыгар уонна оҕолор тус бастыыр иһин күрэхтэһиилэригэр барыта 178 киһи кыттар. "Триумф" спортивнай бэлэмнэнии киинигэр 3 күнүн кыттааччылар сүүрүүгэ дистанцияларынан уонна ядроны олорон, туран эрэн анньыыга күрэхтэһэллэр. Сүүрүүгэ 60, 200, 400 уонна 800 миэтэрэҕэ кытталлар.

Василий Олёнов, күрэхтэһии кылаабынай судьуйата: "2024 сыл түмүгүнэн Саха сирин сүүмэрдэммит хамаандата Россия чемпионатыгар кыттан 15 мэтээли ылбыта. Онтон 9 кыһыл көмүс".

Оҕолор күрэхтэһиилэрэ  "Юные якутяне" үөрэнээччилэр спартакиадаларын чэрчитинэн ыытыллар. Онтон улахан дьон Россия чемпионатыгар сүүмэрдээһин быһыытынан күрэхтэһэллэр.  Манна хамсаныылара хааччахтаах, истибэт, саҥарбат инбэлиит дьон бэйэлэрин кыахтарын холоноллор.

Нина Дьячковская, күрэхтэһии кыттыылааҕа: "Мин спорду сөбүлээтим аҕай. Күүстээх буола сатыыбын".

Евгений Горохов Таатта улууһун хамаандатын биир саамай көхтөөх кыттыылааҕа. Туох баар күрэхтэһиигэ түсүһэн иһэрин кэпсиир. Маннык күрэхтэһиилэргэ эдэрдэри көҕүлүөххэ наада, тоҕо диэтэр үгүстэр саатан дьоҥҥо тахсыбаттар, бэйэлэрин кыахтарын туһамматтарын этэр.

Евгений Горохов, күрэхтэһии кыттыылааҕа: "Ыччаттар наһаа кыбысталлар. Кинилэри кыттан иһиҥ диэн ыҥырабын. Итиэннэ холобур буолан араас күрэхтэһиилэргэ кыттабын".

Түмүккэ дистанцияларынан оҕолорго, улахан дьоҥҥо кыайыылаахтар ааттаннылар. Кинилэр салгыы дойду таһымыгар күрэхтэһэн Саха сирин чиэһин көмүскүөхтэрэ. Саха сирин адаптивнай спорда сыллата сайдар, кыттааччылар үрдүк көрдөрүүнү ситиһэллэр.