Быйыл 17 кыбаарталга 6 дьиэни көтүрүөхтэрэ

60 сыллардааҕы мас тутуулар аа-дьуо көҕүрээн эрэллэр. 8 марта уулуссаҕа биир кэмҥэ тутуллбут 3 дьиэттэн иккитэ хаалан турар. Хаарбах испииһэгэр киирбит олохтоохтор күннэтэ көһүтүүгэ олороллор. Ирина Дъяконова бу дьиэҕэ олохсуйбута 15 сыл буолбут. Кини ыарахан усулуобуйаҕа сиэнинээн олорорун кэпсиир.

Ирина Дьяконова, хаарбах туруктаах дьиэ олохтооҕо: «2025 сылга көрөүөхпүт диэбиттэрэ, да туох да биллибэт. Кэтэһэн олоробут. Үөһэ этээстэрбит ааннара сабыллыбат буолбут. Аллара өттө, муоста барыта уу, халыйа сылдьабыт. Ол иһин кэтэһэ сылдьабыт, тугу эмэ биэрээйэллэр диэммит».

Көһөрүү бырагырааматын иккис түһүмэҕэ 2019 сылтан 2025 сылга диэри үлэлиир болдьохтоох. Онон быйыл  түһүмэҕи түмүктүүр суолталаах сыл. Дьокуускай куоракка үгүс хаарбах дьиэлээх 17 кыбаарталга, билиҥҥитэ "Спортивнай" диэн ааттанар дьоҕус түөлбэҕэ дьэ хамсааһын тахсан эрэр.

Семён Потапов, Өрөспүүбүлүкэтээҕи ипотека агенствотын көһөрүүгэ салаатын салайааччы: «Бу сылга биһиги уонча дьиэни көһөрүөхтээхпит. Билигин алта дьиэни кытта үлэлии сылдьабыт. Дьиэлэри көтүрэрбит чугаһаан сылдьар. Бастакы дьиэни ахсынньы ыйга көтүрбүппүт. Онон бу сылга уопсайа 160-ча кыбартыыраны көһөрүөхтээхпит». 

17 кыбаарталга уопсайа 166 дьиэ баарыттан 154 хаарбах туруктаах. Манна барыта  2500 дьиэ кэргэн олорор. Көһөрүүнү ылсыбыт бэдэрээттээх тэрилтэ этэринэн, 2023 сылга диэри сорук толору туолан, биир да мас дьиэ суох буолуохтаах. Оттон быйыл 9 тыһ. кв миэтэрэ иэннээх бастакы дьиэ тутуутун саҕалыахтара.

«Өрөспүүбүлүкэҕэ быйыл сыл устат 48 тыһыынча киһи көһөрүү бырагырааманан олорор усулуобуйатын тупсарыа. Ону сэргэ 11 тыһыынча киһи “Инфраструктура для жизни” диэн национальнай бырайыагынан саҥа дьиэлэниэ. Холобур, биһиги кэлэн турар 8 марта 89/1 дьиэтэ быйыл уочаракка турар».

Итини салгыы Суров аатынан уулусса 26/1 дьиэтэ көтүрүллүө. Уопсайа быйыл 370 мөл Дьокуускай куоракка көһөрүүгэ тыырыллыбыт. Бу үп 4-5 дьиэҕэ тиийэр.  Оттон балаҕан ыйыттан саҥа түһүмэх саҕаланыа.

Дмитрий Садовников, СӨ Бырабыыталыстыба бэрэссэдээтэлин бастакы солбуйааччы: «Дойду таһымыгар аадырыстаах бырагыраама салгыы хайдах үлэлиирэ биллэ илик. Бу боппуруос өссө аһаҕас турар. Оттон биһиги тус бэйэбит бырабыыталыстыба аатыттан дьүүллэһии кэмигэр бырагырааманы уруккутунан хаалларыы туһунан тус санаабытын этэн турабыт».

Манна саамай сытыытык хаарбах уонна саҥа бэриллэр дьиэ сыанатын араастаһыытын тула дьүүллэһии барар. Билигин регионнарынан ырытыһыы барар турар.