Бизон ахсаана элбиир

Уус Буотама бизоннарыгар быйылгы кыстык этэҥҥэ барар, ас-үөл тиийэр. Саамай тымныы дойду кыыллара ас бириэмэтин куоттарбакка, ыҥырыынан сүүрэн кэлэллэр.  Саха сирин тыйыс тымныытыгар үөрэммит кыыллар туруктара үчүгэй.

Саха сиригэр 2006 сыллахха анал бырагырааманан аан бастаан 30 бизон кэлбит буоллаҕына, билигин кинилэр уопсай ахсааннара 300-тэн тахса буолла. Онон маннааҕы усулуобуйа оруобуна кинилэргэ аналлааҕа толору бигэргэннэ.

Сергей Егоров, СӨ Айылҕа баайын уонна ытык харыстанар сирдэр дирекцияларын  айылҕа баайын салаатын салайааччыта: "Ойуур бизоннарыттан саамай тымныы сиргэ турааччылар биһиэннэрэ. 50-60 кыраадыс тымныылаах сиргэ кыһыны этэҥҥэ туорууллар".

Бизонарий тутаах үлэһитэ Алексей Митрофанов. Биһиги көрдөхпүтүнэ бары биир сирэйдэр, онтон кини  хас биирдиилэрин арааран билэр. Майгыларын да номнуо үөрэппит. 

Алексей Митрофанов манна үлэлээбитэ сэттис сыла. Бизоннары иитии үлэтин ситиһиитэ кини хараҕын далыгар ааһар. Уонна кини көмөтүнэн төрөөһүн ахсаана улаатта.

Алескей Митрофанов, "Уус Буотама" бизонарий үлэһитэ: "Кыһыҥҥы кэмҥэ улахан куттала суохтар. Төрүүр-ууһуур кэмнэригэр оҕолоруттан көҥөөн сэрэхтээхтэр".

Былырыыҥҥыттан бизоннары элбэтэр, тэнитэр сыалтан улахан үлэ ыытыллар. Ол курдук  Сунтаарга, Горнайга, Үөһээ Бүлүүгэ уонна Өлүөхүмэҕэ туспа көҥүл сылдьар үөрдэри бэлэмнээн саҕалаабыттар.

Сергей Егоров, СӨ Айылҕа баайын уонна ытык харыстанар сирдэр дирекцияларын  айылҕа баайын салаатын салайааччыта: "Наманы диэн үрэх баар Өлүөхүмэ, Үөһээ Бүлүү, Сунтаар икки ардыгар. Биһиги былырыын онно кэтээн көрөр пуун тэрийдибит.  Онно 17 бизоммут сылдьар".

Манна Буотамаҕа барыта 40 төбө турар, оттон саамай улахан питомник Горнай улууһугар Тыымпынай сиригэр баар, онно бизоннар ахсааннара номнуо 127-ҕэ тиийдэ.

Бизоннар төрүөхтэрэ муус устар ыйтан саҕаланар. Уонна от ыйын ортотугар диэри буолар. Бизон 1 миэтэрэ 80 сантымыатырга тиийэ уһуур уонна 800 киилэҕэ тиийэ улаатар.  Төрөөбүт тарбыйахтары питомниктарынан араараллар, ордук Сиинэ пааркатыгар ыыталлар. Кэнники сылларга кэҥээн, аны атын регионнары кытта үлэлэһэллэр.