Саха сирин үрдүнэн кыстык үгэнэ

Хаҥалас улууһун Улахан Аан нэһилиэгин "Бөртө" хаһаайыстыбатыгар 1200-тэн тахса ынах-сүөһү этэҥҥэ кыстаан турар. Онтон ыанар ынаҕа 400-тэн тахса. Хаһаайыстыбаҕа бу тохсунньу саҥата номнуо 20 ньирэй төрөөтө.

Кэрэчээнэ Юмшанова, "Бөртө" сылгы собуотун зоотехнига: «Төрүөхпүт тохсунньу ыйтан саҕаланна. Маассабай төрүөх олунньу – кулун тутар саҕаланыахтаах».

Үүккэ былааннарын аһара толорон иһэллэр. Быйыл хаһаайыстыба үлэһиттэригэр саҥа дьиэ киирэн сүргэлэрэ көтөҕүллэ сылдьар. Ол курдук манна хас даҕаны ыал үлэһиттэр толору хааччыллыылаах дьиэҕэ көһөр кыахтаннылар. Маны тэҥэ хаһаайыстыбаҕа уопсай төбө ахсаанын элбэтиигэ былааннаах үлэни ыыталлар.

Ульяна Семёнова, "Бөртө" сылгы собуотун биригэдьиирэ: «2024 сылга 90% төрүөх ыллыбыт. Валовай ыам биир ынахтан 2500 буолла. Племхаһаайыстыба 3000 тахсан эрэр. Төбө ахсаана эбиллэр».

Бөртө сылгы собуотугар ынах-сүөһүнү тэҥэ, 800-тэн тахса сыспай сиэллээх баар, онтон биэтин ахсаана 520. Быйыл өрөспүүбүлүкэ үрдүнэн этиллибитин курдук сылгыга үтүө кыстык ааһан эрэр. Кулун ылыыта 2024 сыл түмүгүнэн эмиэ үчүгэй көрдөрүүлээх. Маны тэҥэ, сылгы сыыйа эбии аска саҥа киирэн эрэр.

Александра Петрова, СӨ ТХМ сүөһү иитиитигэр департаменын сүрүннүүр исписэлииһэ: «Өрөспүүбүлүкэ үрдүнэн 4795 сылгы эбии аска киирэн турар. Былырыын баччаҕа 7800 төбө турбут эбит буоллаҕына».

Ааспыт сайын өрөспүүбүлүкэ үрдүнэн 411 тыһыынчаттан тахса от оттонон, былаан 94 бырыһыана туолбута. Үгүс улуустарга от хамапаанньата этэҥҥэ түмүктэнэн хаһаайыстыбалар кыстыгы толору оттоох көрсүбүттэрэ. Сиилэс, сенаж эмиэ былаанынан бэлэмнэммитэ. Онон күөххэ диэри тиийэр сүөһү аһа баар.