Быйыл саас эрдэлиэ диэн сылыктыыллар
Тохсунньу томороон тымныыта тоһутта илик. Бэл, социальнай ситимҥэ тарҕаммыт видеоҕа көстөрүнүү Бүлүү улууһугар лыах тиллибит. Таһырда Дьокуускайга ортотунан 27-29 эрэ кыраадыс турар. Сынньалаҥ паркатыгар дьон кэлиитэ биллэ элбээтэ, өрөбүллэргэ өссө эбиллэр. Ким оҕолорун кыта кэлэн дьаарбайар, ким көннөрү хаамар. Киин куоракка сиэннэрин көрөн олорор эбээлэр халлаан сылааһыттан сэргэхсийэн салгын сии сылдьаллар.
Лариса Львова, Дьокуускай олохтооҕо: "Салгын олус ыраас уонна сылаас хаамарга. Манна уу чуумпу".
Күн ахсын сымнаҕас халлаан хас биирдии киһиэхэ үтүө туругу, сүргэни бэлэхтиир. Ыыс туман кэннэ харахтан сыыһы ылбыттыы тула барыта чаҕылхай буолбута үөрдэр.
Анастасия Дмитриева, Дьокуускай олохтооҕо: "Сылыйбыта наһаа үчүгэй. Кыһын буолан баран тымныы буолуохтаах, ол эрэн сааһырбыт киһи тымныыга наадатыгар эрэ таһырдьа тахсан киирэр. Онон сылыйбыта олус үчүгэй".
Оттон бу аҕай иннинэ Саҥа дьыл бастакы күннэригэр 50 кыраадыстаах аам-даам тымныылар турбуттара. Синоптиктар бэлиэтииллэринэн маннык температура киин куоракка уонна кэккэ улуустарга 36 сыл анараа өттүгэр эрэ турбут эбит.
Саргылаана Никитина, Дьокуускайдааҕы күнү-дьылы кэтээн көрөр сулууспа күн-дьыл туругун сылыктыыр салаатын салайааччыта: "Саҥа дьыл түүнүгэр курдук улахан тымныы бүтэһигин 1988 сыллаахха бэлиэтэммитэ. Саамай тымныы күн-дьыл Өймөкөөн, Кэбээйи, Нам оройуоннарыгар 56 кыраадыска тиийэ тымныйбыта. Тохсунньу 5 күнүгэр илинтэн, арҕааттан сылаас салгын маассата киирэн сылыйда".
Маннык сылаас күн-дьыл улахан уларыйыыта суох Кириһиэнньэҕэ диэри турара күүтүллэр. Норуот итэҕэлинэн, тохсунньу Таҥха Хаан ыйа, саамай тымныы ый, түүнэ уһун, күнүһэ кылгас.
"Тохсунньу ыйга сааһы уонна сайыны билгэлииллэр. Бу ыйы от ыйа батыһар. Тымныйдаҕына сайына сөрүүн, оттон сылыйдаҕына куйаас буолар. Тибии түстэҕинэ от ыйа сөрүүн буолара күүтүллэр, оттон кыраһалаатаҕына өҥ сайын күүтүллэр", - Татьяна Николаева, корреспондент.
Дойду күнү-дьылы кэтээн көрөөччүлэрэ быйыл саас эрдэ кэлиитин сылыктыыллар.Ол курдук үгүс регионнарга, Саха сригэр тохсунньу ыйтан салгын температурата нуорманы таһынан үрдүк буолар диэн сабаҕалыыллар.