Саха сиригэр ааспыт сылга 15 саҥа оскуола тутуллунна

Саҥа сылы көрсө Ытык күөлгэ 450 миэстэлээх үөрэх кыһата арылынна. Саҥа оскуола 4 мэндиэмэннээх, 10000 м² тахса иэннээх. Оҕо үөрэнэригэр туох баар усулуобуйа барыта тэриллибит.

Вера Михайлова, А.Е. Мординов аатынан Тааттатааҕы лицей дириэктэри иитэр үлэҕэ солбуйааччы: «Оскуолабыт дириҥэтэн үөрэтэр предметээхпит. Маны таһынан фирменнэй кылаастар диэн бааллар».

Силигэ ситэн, кэлэр кэнчээри ыччаппыт билиини ылар, сайдар саҥа дьиэлэннилэр.

Айсен Николаев, СӨ Ил Дархана: «Билигин мантан дьэ кынаттананнар, оҕолор даҕаны үчүгэйдик үөрэнэн өссө үчүгэй билиини, санааны ылан тахсыахтара».

"Үөрэх" национальнай бырайыак чэрчитинэн Дьокуускайга 1 нүөмэрдээх Марха орто оскуолатын эбии дьиэтэ үөрүүлээх арыллыыта буолла. Саҥа эбийиэк 326 миэстэлээх, 6 тыһ. кэриҥэ миэтэрэ иэннээх. Үөрэнэр кабинеттар таһынан, библиотека, лаборатория, үнкүү, спорт саалата баар.

Ньургуна Соколова, СӨ үөрэх уонна наука миниистирэ: «Өрөспүүбүлүкэ үрдүнэн барыта 54 социальнай эбийиэк үөрэҕирии өттүтүнэн тутулла турар».

Кэнчээри ыччат саҥа хардыылара бииртэн биир үрдэллэрэ сайдыы суолун тутуоҕа.

Евгений Григорьев, Дьокуускай куорат баһылыга: « Ол курдук Дьокуускай куораппыт 2030 сылга дылы 12 оскуола, 18 оҕо уһуйаана тутуллуохтаах».

Аҕыйах нэһилиэнньэлээх дьоҕус бөһүөлэктэргэ эмиэ улахан болҕомто ууруллар. Күһүн Кэбээйи улууһун Сайылык нэһилиэгэр 275 миэстэлээх, Горнай улууһун Атамай нэһилиэгэр 150 миэстэлээх саҥа оскуола үлэҕэ киириитэ, оҕолорго дьоһун бэлэх буолбута.

Оҕо билиҥҥи кэмҥэ киэн билиилээх, бары өттүнэн сайдыылаах буоларын ситиһэргэ сөптөөх усулуобуйаны тэрийиини, киэн билиилээх ыччат дьону иитэн таһаарарга Өрөспүүбүлүкэ салалтата инники күөҥҥэ тутар.