Өрөгөй уораҕайыгар ааһан эрэр сыл спорт ситиһиилэрин түмүгүн таһаардылар

Ааһан эрэр сыл бастыҥ спортсмена, сүүрүүк Сардаана Трофимова аны кэрэ эйгэтигэр, үҥкүүгэ бэйэтин көрдөрдө. Сыанаҕа чэпчэкитик көтө-дайа сылдьар нарын кыыс бу сылга күүстээх санаатынан, харса суох үлэлээн, дьаныардаахтык дьарыктанан Олимпиадаҕа тиийэр сыалын ситиспитэ. Саха сирин дьонугар уонна ордук бэйэтигэр бу ыра санаа туолуута буолбута.

Сардаана Трофимова, "Сыл бастыҥ спортсмена" номинация кыайыылааҕа: «Олимпиадаҕа кыттан, баҕа санаам туолан үчүгэй сыл ааста дии саныыбын».

Бу сыл Саха спордугар кырдьык да үгүс ситиһиилээх сыл. Аҥардас олимпиадаҕа сахалартан 5 киһи кыттыыны ылбыта - бу историяҕа хаалар бэлиэ түгэн. Ол курдук, Сардаана Трофимова, Айаал Лазарев, Виктор Рассадин, Владимир Егоров, Георгий Окороков саха норуотун аар-саарга аатыртылар. 

Өссө биир бэлиэ түгэн 8-с Азия оҕолоро оонньуулар. Оҕо спордун бырааһынньыга киин куоракка үрдүк таһымҥа ааспыта. Манна анаан саҥа спорт эбийиэктэрэ дьэндэйбиттэрэ, итиэннэ үгүс спорт кииннэригэр оннуттан өрөмүөн үлэлэрэ ыытыллыбыттара. Манан сиэттэрэн идэтийбит спортсменнарга, нэһилиэнньэҕэ дьарыктаналларыгар анаан усулуобуйа өссө тубуста.

Михаил Пахомов, "Триумф" спорт уораҕайын дириэктэрэ: «Барытын оҥордубут. Ил Дархан уонна Бырабыытылыстыба өйөөн барытын саҥардыбыт».

Быйыл бары көрүҥҥэ ситиһии элбэх. Арассыыйа, аан дойду чемпионнарын кэккэлэрэ хаҥаата. Сылы ситиһиилээхтик боксердар саҕалаабыттара, ол курдук Василий Егоров Арассыыйа кубогын кыайбыта, итиэннэ бу сылга кини риингэҕэ бүтэһик киирсиитин кыайан улахан спортан барарын туһунан биллэрбитэ.

Василий Егоров, Россия спордун үтүөлээх маастара, Россия 5 төгүллээх, Европа 2 төгүллээх чөмпүйүөнэ: «Сыалым-соругум – саха норуотун ааттатан, бүтүн Арассыыйа чиэһин көмүскээн киирсэн кэлбитим».

Боксаттан саҕалаан сылы кыайыынан кикбоксердар түмүктээтилэр. Арассыыйа чемпионатыттан 9 мэтээллээх кэлбиттэрэ, ол иһигэр 2 кыһыл көмүс, 4 үрүҥ уонна 3 боруонса. Михаил Иванов Россия 3 төгүллээх, оттон Вадим Колтовской 5 төгүллээх чемпион үрдүк аатын сүкпүттэрэ.

Оттон көҥүл тустууга быйыл саҥа тахсан эрэр эдэр бөҕөстөр үрдүк таһымы көрдөрдүлэр. Лев Павлов 10 күрэхтэһиигэ кыттан 9-гар мэтээл ылары ситиспитэ уонна бу сыл бастыҥ спортсмена буолла.

Лев Павлов, "Сыл бастыҥ спортсмена" номинация кыайыылааҕа: «Бу сылга элбэхтэ күрэхтэстим, элбэх таһымнаах күрэхтэргэ миэстэлэстим».

Онон 2024 сыл түмүгүнэн Саха сирин спорда үрдүк таһымҥа тахсыбытын бэлиэтиэхпитин сөп. Оттон бу спортсменнар, кинилэр тренердэрэ сыралаах үлэлэрин түмүгэ. Кэлэр сылларга эмиэ улахан ситиһиилэр кэлиэхтэрэ диэн күүтэбит.