Экология министиэристибэтэ сыллааҕы түмүгүн таһаарда

Экология министиэристибэтин үлэтэ сөп дьаһаллаахтык ыытыллынна диэн этэн туран, бырабыытылыстыба бэрэссэдээтэлин солбуйааччы Ольга Балбакина түмүктүүр тэрээһини арыйда. Чахчы быйыл тустаах биэдэмистибэ үлэтигэр үгүс уларыйыылар киирдилэр. Онтон биирдэстэрэ булт хаһаайыстыбатын кэнсиэпсийэтигэр.

Николай Додохов, СӨ экология, айылҕаны туһаныы уонна ойуур хаһаайыстыбатын миниистирин солбюуйааччы: «Тепловизордаах, ночниктаах бултуур кыылга тыыннаах хааларыгар кыах хаалларбат. Ити этиилэрбитин федералларбытыгар тиксэрэбит. Уонна болдьохторбутугар эмиэ этиилэр бааллар».

Ылыллыбыт кэнсиэпсийэ 2035 сылга диэри көдьүүстээҕин көрдөрүө диэн булт салаатын үлэһиттэрэ иһитиннэрэллэр. Маныаха быйыл ойуур баһаардарын умулларыыга улахан хардыы оҥоһулунна.  Дойду Бэрэсидьиэнин өйөбүлүнэн үбүлээһин улаатан, Авиалесоохрана салааларын элбэтиигэ улахан үлэ ыытыллыаҕа.

Джулустан Хон, СӨ экология, айылҕаны туһаныы уонна ойуур хаһаайыстыбатын миниистирин бастакы солбуйааччы: «Быйыл баһаары барытын умулларан бастыҥнарга киирдибит дойду үрдүнэн. Эһиил Бэрэсидьиэн Владимир Владимирович көмөтүнэн инники сылларга 5 авиаотделение тэрийиэхтээхпит. Онно 2,7 млрд харчыны сыл аайы бэдэрээлинэй бүдьүөттэн эбии киирэр буолла».

Экология хайысхатыгар кэлиҥҥи кэмҥэ үрдүкү салалта да өттүттэн нэһилиэнньэ да өттүттэн болҕомто ууруллара күүһүрбүт. Холобура, быйыл Саха сирэ Арассыыйа үрдүнэн экологическай аахсыйалары, араас тэрээһиннэри ыытыыга инники күөҥҥэ таҕыста. Онно төһүү - улуустар үлэлэрэ. Быйыл Кэбээйи оройуона үлэтин көрдөрүүтүнэн бастакы миэстэҕэ таҕыста.

Елена Беленкова, Кэбээйитээҕи экологическай кэтэбил сүрүннүүр судаарыстыбаннай иниспиэктэрэ: «Биһи улууспут быйыл 3645 тэрээһин ыытта. Онно 1562 киһи кытынна. Ол иһигэр субуотунньуктар, аахсыйалар нэһилиэк аайы».

Бу курдук 2024 сыл экология министиэристибэтигэр өрө көтөҕүүлээхтик ааста. Түмүктүүр тэрээһиҥҥэ үтүө суобастаахтык үлэлээбит дьоҥҥо наҕараадалар туттарыллыннылар. Эҕэрдэ тыллар этиллиннилэр.