Дьокуускай хаартан босхолонор үлэтин тохтоппот
Саха циркэтэ - куорат киин оройуоннарыттан биирдэстэрэ. Бу эргин элбэх киһи сылдьар буолан, хаары ыраастааһын көхтөөхтүк ыытыллар.
Ньурба улууһуттан төрүттээх Алексей Ананьев киин куоракка суол-иис үлэтигэр киирбитэ аҕыйах ый буолла. Эдэр киһи сарсыарда эрдэттэн киэһээ хойукка диэри суолу-ииһи, маннык уопсастыбыннай сирдэри ыраастыыр түбүгэр сылдьар. Учаастактарынан арахсан хас да буолан үлэлииллэр.
Алексей Ананьев, суол тэрилтэтин үлэһитэ: «Күннээҕи үлэбит хаар түстэҕинэ, сытар буоллаҕына ыраастыыбыт. Аадырыстарынан уонна уопсастыбыннай сирдэринэн сылдьабыт».
Куорат суолларыгар бу маннык үлэ тиһигин быспакка барар. Хас хардыы ахсын тиэхиникэлээх суол үлэһиттэрин көрсүөххэ сөп. Аны аҕыйах хонкктааҕыта быыстала суох хаардаан үлэ хас эмэ бүк эбилиннэ. Ортотунан күҥҥэ 50 киһи, оччо араас тиэхиника хаар ыраастааһыныгар үлэлиир. Дьокуускайга ортотунан аҥардас биир суукка иһигэр балтараа тыһыынча кууб хаары тиэйэн таһаараллар. Айаан Анисимов “Якутдорстрой” тэрилтэҕэ тырахтарыыһынан бу күһүҥҥүттэн үлэлиир. Күннэтэ 12 чаас устата араас уулуссаларынан сылдьан үлэлиир. Хас да тиэхиникэни кытта дьүөрэлии, ким бэлэмнэн, ким ол кэннэ ыраастаан биэрэр эбээһинэстээх.
Айаан Анисимов, суол тэрилтэтин үлэһитэ: «Сарсыарда 8-тан медосмотр ааһан баран үлэбитигэр тахсабыт киэһээ аҕыска дылы. Билигин хомуйан бэлэмниибин, ол кэннэ ыраастыыбын».
Үлэһиттэр 2 сменанан хаары ыраастыыллар. Күнүһүн 40 киһи, түүнүн 15-20 үлэһит тахсар. Маны тэҥэ, маннык көстөрүн курдук улахан тиэхиникэ хас да көрүҥүн көхтөөхтүк туһаналлар. Инньэ гымматахтарына үлэ биллэн турар кыайтарбат. Онон бары күүһү-хаар ыраастааһыныгар уураллар.
Хаары ыраастааһынан, тиэйиинэн-таһыынан үлэ муҥурдаммат. Халтарааны сэрэтэр инниттэн кумаҕы кутуу тэрээһинин эмиэ ыыталлар. Ол курдук тротуардары, суолу туоруур пешеходтары, итиэннэ автобус тохтобулларыгар кумаҕы кутан тарҕаталлар. Бу нэдиэлэҕэ Дьокуускай эргин, итиэннэ кэккэ улустарга хаар өлгөмнүк түстэ. Ахсынньы ый бүтэрэ бу кэллэ, ол эрээри күн-дьыл улаханнык тымныйа илик, 30-тан тахса кыраадыһы көрдөрөр, оттон ый бүтэһик күннэригэр тымныйара күүтүллэр.