Дьокуускайга Саҥа дьыллааҕы тыыннаах харыйа атыыта саҕаланна

Саҥа дьыл биир бастыҥ бэлиэтэ кэрэчээн күөх харыйа. Оттон тыыннаах буоллаҕына сыттыын-сымардыын кытта сааһыттан тутулуга суох киһини аптаах-алыптаах иэйиигэ куустарар. Дьокуускай куорат олохтооҕо, аҕам саастаах Сергей Никитич Климов номнуо оҕо сааһыттан саҥа дьылга тыыннаах харыйаны эрэ билинэбин диир. Көрүү-харайыы чааһын эмиэ баһылаабыттар. 

Сергей Климов, Дьокуускай куорат олохтооҕо: «Оскулаҕа үөрэниэхпиттэн ыла харыйаны туруораллар этэ. Оттон куоракка үксэ бэһи туруораллар эбит. Ийэбит раствор оҥорон туруорар, олунньу ортотугар дылы турар».

Сергей Никитич бу Якутлесресурс баазатыттан бүтэһик харыйаны ылан хаалла. Быйыл манна 50 эрэ устуука харыйа кэлбит онон көрүөх бэтэрээ өттүгэр барыта бүттэ. Билигин бэс мас атыыта салҕанар. Сыана биллэн турар мас көрүҥүттэн араастаһар. Холобура биир миэтирэҕэ диэри уһуннаах бэһи икки тыһыынчаҕа, оттон 2 миэтирэ урдуктээҕи икки аҥаарга уонна иккиттэн үөһээ миэтирэлээҕи 3 тыһыынча солкуобайга ылыахха сеп. Бу сырыыга бэстэри киин куорат эргин бэлэмнээбиттэр. Онон кылгас кэмҥэ харайыллыбыт, уһун айаны ааспатах буолан дьоһун, кэрэ көстүүлээхтэр. Оттон тыыннаах харыйаны көрүү-истии эмиэ бэйэтэ туспа кистэлэҥнээх.

Александр Афонин, "Якутлесресурс" тэрилтэ ойуур харыстабылыгар инженерэ: «Тыыннаах харыйаны эбиһээт ууга туруоруохха наада, эбэтэр кумахха. Кумахха бастаан элбэх ууну иһэр тыылларыгар уонна 1-2 күн аайы уу кута сылдьыахха наада. Бэс олунньу ыйга дылы турар».

Оттон бэйэбит дойдубут мастарын тэҥэ билигин урбаанньыттар атыыга атын регионнартан эмиэ харыйаны аҕалар буоллулар. Холобура бу Пермь куораттан анаан-минээн мас питомнигар үүннэриллибит харыйалар. Онон көрүҥнэрэ чиҥкэ атын, эрээри көрүүтэ-харайыыта соччо уратыта суох. Маныаха атыыһыттар тыыннаах харыйаны бастакытын ылар дьоҥҥо сиһилии барытын быһаараллар.

Алексей Юсупов, урбаанньыт: «Чтобы “разморозить” елку, надо поставить в прохладное место в холодную воду, можно добавить аспирин, сахар. Постоит так пару часиков и ей будет достаточно».

Онон тыыннаах харыйа төһө өр турара көрүүттэн-истииттэн быһаччы тутулуктаах. Ол эрэн дыргыл сыттаах саҥа дьылы ылыан баҕалаахтарга бу кыһалҕа буолбатах. Оттон харыйа, бэс атыыта бу ый бүтүөр диэри салҕаныаҕа.