Горнай Бэрдьигэстээҕэр "Эр киһи оскуолата" бырайыак үлэлиир

Бэрдьигэстээххэ "Эр киһи оскуолата" диэн обургу уолаттарга анаммыт бырайыак түмүктүүр түһүмэҕэ буолла. Манна уолаттар Афганистаҥҥа, Чечняҕа сэриилэспит бойобуой дьайыылар  бэтэрээннэрин уонна анал байыаннай дьайыы кыттыылаахтарын кытта көрүстүлэр. 4 оҕо аҕата, баһаарынай чааска үлэлиир Алексей Парников бу сыл саҥата баҕа өттүнэн 6 ыйга хантараак баттаһан анал байыаннай дьайыыга кыттан кэллэ, онно пехотаҕа, разведкаҕа сырытта, ону тэҥэ бөлөххө хамандыырдаата.

Алексей Парников, анал байыаннай дьайыы кыттыылааҕа: «Билиҥҥи ыччат инники олоххо барытыгар бэлэм буолуохтаах дии саныыбын. Бары өттүнэн кыра да буоллар сайдыылаах уонна бэлэм буолуон наада».

Көрсүһүүгэ Бэрдьигэстээх үс оскуолатыттан уопсайа 15 уол кэлэн, анал байыаннай дьайыы хайдах-туох быһыылаахтык барарын илэ бэйэлэринэн кыттыбыт дьонтон быһаччы иһиттилэр. Дойду көмүскэлигэр сылдьар эр киһи ханнык хаачыстыбалары бэйэтигэр сайыннарыахтаахтарын биллилэр.

Тамерлан Черепанов - Бэрдьигэстээх А.Н. Осипов аатынан орто оскуолатын 10-кыл. үөрэнээччитэ: «Элбэҕи биллим. Мин Юнармияҕа быйыл киирдим. Күрэхтэһиилэргэ кыттарым үчүгэй».

Бэрдьигэстээх аҕаларын сүбэтэ тэрийбит "Эр киһи оскуолата" ыччаты дойдуга бэриниилээх буола иитэргэ туһуламмыт бырайыак улуус баһылыгын өйөбүлүн ылан балаҕан ыйыттан саҕалаан  4 түһүмэхтээх үлэни ыытта.

Алексей Аргунов, Бэрдьигэстээх нэһилиэгиин баһылыга: «Нэһилиэкпит оскуолаларын оҕолорун илдьэ Сиинэ үрэххэ балыктыырга, уот отторго, эр киһи оскуолатын аастылар. Уонна кыһын Мытаахха Чемезов Руслан ыҥыран муҥхаҕа үөрэттэ».

Аныгы кэм уолаттарын дойдуга бэриниилээх буоларга, олох-дьаһах үөрүйэхтэригэр уһуйар, киһи быһыытынан үтүө дьон буола улааталларыгар иитэр-үөрэтэр бырайыак олоххо киирбитин төрөппүттэр, ордук уолаттарын соҕотох иитэр ийэлэр биһирээтилэр. Кэлэр өттүгэр маннык тэрээһиннэр тиһигин быспакка салҕаналларыгар баҕалаахтарын биллэрдилэр.