Дьокуускайга өрөспүүбүлүкэтээҕи харах балыыһатыгар рекорд олохтонно

Харахха биир алҕас да хамсаныы бырастыы гыммат. Уопуттаах хирургтар олус үөрүйэхтик тутталлар. Хатараактаны ылыы муҥутаан 15 мүнүүтэҕэ диэри салҕанар. Кылгас кэмнээх эпэрээссийэҕэ халыҥ хамаанда уһун сыллаах уопута түмүллэр. Бу сырыыга хирургтар күннээҕи толоро сылдьар үлэлэрин, сатабылларын бириэмэҕэ холоноллор.

Маны барытын "Россия рекордарын кинигэтин" бэрэстэбиитэллэрэ кэтииллэр. Сорук 2 чаас иһигэр тэҥинэн 100 киһини эпэрээссийлээһин.  Онон хас биирдии хирург бириэмэтэ чопчу бэлиэтэнэн иһэр. Үлэһиттэр биир киһи курдук туох да иҥнигэһэ суох хамсаналлар. Бириэмэ хаачыстыбаҕа хайдах да охсубатын этэллэр. Оттон бүрүө бүрүйэ сылдьыбытын эмтэппит ыарыһахтар эпэрээссийэ остуолуттан тута чэпчээн түһэллэр. Горнайтан сылдьар Роман Ноговицын биир бастакынан оҥоһулунна.

Роман Ноговицын: «Туох да ыарыыта суох эпэрээссийэтэ».

100 эпэрээссийэ харах балыыһатын 100 сыллаах үбүлүөйүгэр туһуланар. Хирург Максим Дьячкосвкай  бэриллибит кээмэйин биир чааһынан толорон аны үөлээннээхтэригэр көмөлөһөр. Онон кини барыта 18 киһи хатараахтатын оҥордо.

Максим Дьячковский, Өрөспүүбүлүкэтээҕи харах балыыһатын офтальмолог-хирург бырааһа: «Бэлэмнээһин сүрдээх. Поликлиника быраастарыгар махтанабын. Бэйэм нэдиэлэ курдук бэлэмнэммитим. Эпэрээссийэбит барыта этэҥҥэ ааста. Кэлэктииппин барытын эҕэрдэлиибин, бары маладьыастар».

Бүтэһик киһи эпэрээссийэлиир остуолтан түһээтин кытта үрүҥ халааттаах аанньаллар үөрэн ытыстарын таһына түһэллэр. Өрөспүүбүлүкэтээҕи харах балыыһатын хирургтара 100 киһини 2 чаас 18 мүнүүтэ эпэрээссийээлэбиттэрэ бигэргэнэр. Бу туоһута анал Сертификат туттарыллар.

Иван Луцкан, Өрөспүүбүлүкэтээҕи харах балыыһатын кылаабынай бырааһа: «Для специалистов нашей больницы это обычная практика. Хирурги проводят порой и большее количество операций. В истории больницы была цифра - 160 пациентов за один день. Команда нашей больницы еще раз показала слаженную работу, четкий отработанный механизм доставки пациентов и их операций».

Харах балыыһата өссө кэҥээтэ, эбии эпэрээссийэлиир саалалар эбилиннилэр. Онон кэлэр сылтан өссө элбэх киһини хабыахтара. Күн бүгүн саха сирин хирургтара бу көрүҥ эпэрээссийэни оҥорууга маҥнайгы иһэллэр.