Кэбээйи улууһугар Олоҥхо ыһыаҕар бэлэмнэнии үлэлэрэ саҕаланнылар

Үөрэх кыһатыгар төһө да сынньалаҥ кэмэ буоллар, уран тарбахтаах кыргыттар иис абылаҥар ылларан олороллор. Оттон бу төрүөтэ - аны икки сылынан ыытыллар Өрөспүүбүлүкэ таһымнаах  Олоҥхо ыһыаҕа. Иистэнньэҥнэри Кэбээйи орто оскуолатын үлэ уруогар учуутала Туйаара Дьячковская салайар.

Туйаара Дьячковская, Кэбээйи орто оскуолатын үлэ уруогун учуутала: «Бу Олоҥхо ыһыаҕар олбох тигэн эрэбит. Көрүдүөргэ уурабыт, ону ким баҕалаах кэлэн тигэр. Үчүгэйдик иистэнэр оҕолор маастар-кылаас көрдөрөллөр бэйэлэрэ».

Бу курдук күннэтэ ким иллэҥнээх, үөрэх сынньалаҥар кэлэннэр олбох тигэллэр. Билигин номнуо 50 устуука тигиллибит. Маныаха күннэтэ бэлэм халыыптар оҥоһуллан бэлэмнэнэллэр. Тигии үлэтэ быыстала суох барар.

Олоҥхо тыына номнуо оскуолаҕа биллэр. Соторутааҕыта үөрэх кыһатыгар "Төрөөбүт тыл түһүлгэтэ" диэн бырайыак олоххо киирбитэ. Манна 7 эйгэнэн учууталлар оҕолору төрөөбүт төрүт тылбытыгар сыһыараллар. 3-үс улахан эйгэ манна фольклор буолар. Манна учууталлары кытары төрөппүттэр биир сомоҕо буолан оҕолору Олоҥхо эйгэтигэр сыһыараллар.

Светлана Оконешникова, төрөппүт: «Оскуолабыт саха эйгэтин сайыннарыыга ыытар үлэтин төрөппүттэр эмиэ өйүүбүт. Бэйэбит араас куруһуоктары ыытабыт».

Билигин бу оҕолор номнуо Олоҥхо ыһыаҕын арыллыытын сиэригэр-туомугар кытталларыгар ох курдук бэлэмнээх буолуохтара. Маны тэҥэ биллэн туран, нэһилиэк тас бараанын тупсарарага үгүс үлэ барара күүтүллэр.

Илья Левин, "Кэбээйи" МТ баһылыга: «Былаан быһыытынан эһиил элбэх үлэ күүтэр. Ырастаныы, тутааһын үлэтэ. Түөлбэбит, ипподром тутуллуохтаах уонна дьиэлэри, суоллары өрөмүөннүөхтээхпит».

Маныаха билигин улууһу кытары улахан былаан оҥоһуллан, Кэбээйи оройуона бу хайысхаҕа күргүөмнээх үлэни ыытан саҕалыа.