Кыһыҥҥы кэмҥэ биэни ыаһын сэдэх көстүү

Күнүскү ыам. Саха сылгыта барахсан кыһыҥҥы  аам-даам тымныыга кытта таһырдьа, аһаҕас халлаан анныгар туран үрүҥ илгэни бэрсэр. Виктор Сидоров, норуокка биллэринэн Кэнкэмэ Бииктэрэ биэни кыһыҥҥы эрэ кэмҥэ ыыр уратылаах. Кини 20-чэ сыл  дьарыктанар баай уопуттаах буолан, дьөһөгөй оҕотугар ураты сыһыаннаах, үгүс албастардаах. Инньэ гынан Бииктэр сылгылара ынах курдук сымнаҕастар.

Виктор Сидоров, сылгыһыт: «Күһүн убаһаны ыыр саамай тоҕоостоох. Сүөһүнү хотоҥҥо аһата туран ыыр курдук».

Кыһыҥҥы кэмҥэ хаары уулуур буоланнар, үүттэрин хаачыстыбата эмиэ тупсарын сылгыһыт үллэстэр. Бу Үс Хатыҥтан Кымыс Байбалтан кэлбит Хатыҥчаана ыраас хааннаах саха сылгыта. Онон үүтэ хойуу уонна өлгөм.  Икки биэттэн биир ыамҥа 2 хомуос үрүҥ илгэ кэллэ. Бииктэр түөттэ ыыр буолан күннэтэ 8 лиитэрэни сомсор. Итиэннэ тута кымыс кутар. Виктор Сидоров оҥорон таһаарааччылар биир сүрүнү тутуһан үлэлииллэрин өйүүр, онон тыа хаһаайыстыбатын чинчийэр инстиутутун оҥорон таһаарбыт аһытыытын туттар.

Виктор Сидоров, сылгыһыт: «Бииринэн туттар үчүгэй буоллаҕа. Судаарыстыба өттүттэн өйөбүл суох. Биэ үүтэ ынах киэнин курдук субсидияланара буоллар интириэс үөскүө этэ».

Оччоҕо кымыс оҥоһуута тэнийиэ этэ диэн баҕа өттүнэн төрүт дьарыгы харыстааччы Кэнкэмэ Бииктэрэ үллэстэр.  Оттон биэни ыырга убаһаны араарбакка кыстатыахха наада итиэннэ иҥэмтиэлээх, өлгөм окко турдаҕына биэ үүтэ хаҥныбат, сайыҥҥылыы ыатар. Ааспыт сайын кураан буолан от хаачыстыбата үчүгэй, онон сылгылар туруктара  да оннук диэн сылгыт үллэстэр. Онон эбии аһылыкка олунньуттан биирдэ киириэхтэрэ. 

Виктор Сидоров, сылгыһыт: «Алаастар суохтар, син хаһан кыстыыллар. Өртөөһүн ыытыллыбат буолан мөлтөх соҕус».

Баҕа баар буоллаҕына оннооҕор куорат чугаһыгар уустук усулуобуйаҕа кытта сыспай сиэллээҕи тутуохха, ону таһынан биэ ыаһынын курдук билиҥҥи кэмҥэ сэдэх дьарыҥы тутан олоруохха сөбүн Кэнкэмэ Бииктэрэ дакаастыыр.