Бүгүн Аҕа дойду Дьоруойдарын күнэ бэлиэтэнэр
Кэнчээри ыччаппыт хорсун быһыылаах биир дойдулаахтарбыт туһунан сэҥээрэн истэллэр. Экспозицияҕа бэйэ күүстээх санааларынан, хорсун быһыыларынан олохторун толук ууран туран сэрии толоонугар киирсибит Дьоруойдарбыт ааттара суруллубут, мэтириэттэрэ кэчигирэспиттэр. Бу хоско Чечня сэриитин уонна анал байыаннай дьайыы кыттыылаахтарын туһунан сиһилии билсиэххэ сөп.
Манна даҕатан эттэххэ, анал байыаннай дьайыы саҕаламмыта икки сыл иһигэр Саха сириттэн номнуо 9 Арассыыйа Дьоруойа баар буолла. Олортон биирдэстэрэ Таатта улууһуттан төрүттээх Родимир Максимов. Сахалыы сэмэй майгылаах, мындыр өйдөөх киһи дьоруой буолар диэн улахан эппиэтинэс диэн этэр.
Родимир Максимов, Россия дьоруойа: «Арассыыйа Дьоруойа холобур буолар үүнэр көлүөнэҕэ. Сыл аннараа өттүгэр дьоруой буолуом диэн санаабатаҕым. Киһи уларыйар эбит, улахан эппиэтинэс, элбэх болҕомто уураллар».
Кырдьык да, мээнэ ыллыҥ да дьоруой буолбаккын. Дьоруой ураты хаачыстыбалаах, дьулуурдаах-тулуурдаах. Дьиҥнээх олоххо баар уустук быһыыга-майгыга уолуйан хаалбакка, түргэн быһаарыныыны ылынан, хорсуннук хамсанар, түргэнник толкуйдуур киһи. Оттон бу анал байыаннай дьайыыга Саха сириттэн маннык 9 киһи баара бу бары киэн туттуубут буолар.
Ахсынньы 9 күнэ Арассыыйаҕа Аҕа дойду Дьоруойун күнэ. Бу күн биһиги Сэбиэскэй сойуус, Арассыыйа Дьоруойдарын чиэстиибит, санаан-ахтан ааһабыт. Аҕа дойду сэриититтэн саҕалаан биир дойдулаахтарбыт хорсун быһыылара үйэлэргэ хаалар. Ол курдук, Аҕа дойду улуу сэриитигэр Саха сириттэн 24 киһи Сэбиэскэй сойуус 1 киһи Арассыыйа дьоруойа буолбута. Оттон 5 киһи Албан аат уордьанын наҕараадаламмыттара. Бу дьоруойдарбыт ааттарын аҕыйах сыллааҕыта саамай улахан алмаастарга иҥэрэн үйэтиппиттэрэ.
Анатолий Семёнов, "Россия мин историям" түмэл үлэһитэ: «Холобура, бу быыстапкаҕа Сэбиэскэй сойуус дьоруойа Достовалов, Кудряшов, Жадейкин уонна Кондаковтар киэннэрэ бааллар. Ыччаттарбыт кэлэн, холобур, Чусовской туох киһи эбитий диэн, хайдах дьоруой буолбутун билиэхтэрин сөп».
Онон хос эһээлэрбититтэн саҕалаан, Саха хорсун уолаттара, дойду көмүскэлигэр дьоһуннаах быһыыларынан холобур буолаллар. Онуоха дьоруойбут ахсаана элбиирэ туоһулуур.