Диспансеризацияны ааһаргын умнума

Ыарыыны эмтиэхтээҕэр сэрэппит ордук. Дьокуускайдааҕы медицинэ киинигэр доруобуйаларын туругун бэрэбиэркэлэнээччи үгүс. Ол эрэн уһун кэмнээх уочарат суох, эрдэттэн ыйыллыбыт бириэмэҕэ аттаран суруйуу ыытылларын иһин. Ефросинья Филиппова диспансеризацияны ааһыахтааҕын туһунан смс туппут. Ити кэннэ суруттаран, көрдөрүнэн, ирдэнэр анализтары туттаран, номнуо салгыы туһааннаах исписэлиистэргэ анаппыт.

Ефросинья Филиппова, көрдөрүнээччи: "Икки күн иһигэр суруйбуттара. Хаан аналиһын туттардым, ЭКГ түстүм. Аналиһым түмүгэ наһаа үчүгэйэ суох эбит, онон салгыы УЗИ-га суруйдулар".

Диспансеризация нэһилиэнньэ доруобуйатын харыстыыр биир сүрүн хайысха буолар. Манна 18-39 сааһыгар диэри 3 сылга биирдэ көрдөрүнэллэр. Оттон 40 аҕа саастаахтар сыл аайы. Тоҕо диэтэр бу саастан сүрэх-тымыр ыарыыта үксүүр, искэҥ куттала улаатар.  Көрдөрүнүү босхо. Быйыл чинчийии эбиллибит, көрүү дириҥээбит. Олортон биир саамай суолталаахтара дьахтар уонна эр киһи төрүүр-ууһуур доруобуйатын көрүү.

Анисия Ефимова, Дьокуускайдааҕы медицинэ киинин сэрэтэр үлэҕэ салаатын сэбиэдиссэйэ: "ДОРЗ диэн ааттанар, диспансеризация оценки репродуктивного здоровья диэн. Ол аата эр дьон, дьахталлар 18-49 саастарыгар диэри бэрэбиэркэлэнэллэр. Маны сэргэ быйылгыттан гепатит С бэрэбиэркэлээһин баар буолла".

Диспансеризацияҕа дьон, бастатан туран, хроническай ол эбэтэр дьарҕа буолбут ыарыылары быһаартара кэлэр. Сүрүннээн хаан баттааһына, саахар, онкология. Уопсайынан көрдөрүнүү икки түһүмэҕинэн ыытыллар. Бастакыга уопсай туруккунан толору ирдэниллэр медицинскэй көрүүнү ааһаҕын. Оттон иккис түһүмэххэ диспанцеризация түмүгүнэн доруобуйаҕа кэһиллии баар буоллаҕына, анал идэлээх быраастарга салгыы көрдөрүнэн чуолкай диагноһун туоруортарар.

Доруобуйаларын чинчиттэриэн баҕалаахтар медицинэ тэрилтэтигэр эрийэн, эбэтэр "Госусулуги" портал нөҥүө биитэр 122 биир кэлим контакт-киининэн суруттаран көрдөрүөхтэрин сөп. Диспансеризацияҕа анаан балыыһалар өрөбүл күн кытта үлэлииллэр.