"Тиллибит хартыыналар" диэн анал быыстапката турда

Бу курдук худуоһунньук Михаил Носов хартыыналарынан "Тиллибит чахчылар" диэн 17-20 үйэтээҕи саха таҥаһын уонна симэҕин дьүһүйүүнү көрдөрдүлэр. Бу сөргүтүллүбүт үлэлэри көрдөрүү,  быыстапка арыллыытын сүрүн уонна ураты көстүүтэ буолла. 

Ол кэминээҕи, таҥастары, оҥоһуктары, маллары оҥорон үйэтиттилэр - Амма улууһун талба талааннаахтара, уран тарбахтаах уустара, маастардара, иистэнньэҥнэрэ. Бу бырайыак Аммаҕа Олоҥхо ыһыаҕар бэлэмнэнии чэрчитинэн ыытыллан, олоххо киирдэ.

Светлана Петрова, СӨ норуотун маастара, история билимин кандидата: «Дьиэлэригэр олорон эрэ тикпэтилэр. Түмэллэргэ сырыттылар, норуот маастардарын кытта алтыстылар. Холобур, таҥалай сону музей фондатыгар киирэн, көхсө эрэ сылдьар этэ, онтон кээмэйин ыллылар. Оттон иннин Носов хартыынатыттан».

Быыстапка биир сүрүн киэргэлинэн Амма нэһилиэгин бастыҥ уустара, уран тарбахтаахтара ойуулаан-оһуордаан оҥорбут ат симэҕэ буолар. Үүн уонна тэһиин, буутай, көмүс сирэйдээх ыҥыыр, иҥэһэ, бото, ойуу-мандар кычым, чаппараах, монньох, кымньыы, дэйбиир барыта худуоһунньук хартыынатыттан түспүт курдук үүт үкчү диэн кэлбит дьон-сэргэ сэнээрэ көрбүтэ.

Светлана Петрова, СӨ норуотун маастара, история билимин кандидата: «Этнографическай хаартыскалары ыыппытым уонна музейга сылдьыҥ диэбитим. Уус Алдаҥҥа музейга ат симэҕин кээмэйин, тас көстүүтүн көрдүлэр».

Бу күнү сэргэ, ойулуур-дьүһүннүүр национальнай түмэл уонна Амма улууһун дьаһалтата бииргэ үлэлэһэргэ, саҥа бырайыактары олоххо киллэрэргэ сөбүлэҥ түһэристилэр.

Степан Кузьмин, Амма улууһун баһылыга: «Бу сайын экспедиция тахсан   Аммаҕа үлэлээбитэ. 300 тахса экспонаты булбуттара. Бу олус элбэх. Атын улуустарга ортотунан 100-150 булаллар эбит. Онон биһигини киэҥ хабааннаах үлэ күүтэр».

Худуоһунньук Михаил Носов ураты быыстапката, история чахчытын кэрэһэлиир хартыыналар ахсынньы 8 күнүгэр дылы көрдөрүүгэ туоруоҕа.