Саха сиригэр ЛОР сулууспа төрүттэммитэ 75 сыла

Гаврил Неустроев ЛОР салаа саамай баай уопуттаах бырааһа. Гаврил Гаврильевич бүтүн 41-с сылын үлэлии-хамсыы сылдьар. Сэбиэскэй кэмтэн күн бүгүнүгэр диэри эмтээһин ньымата тупсан, сайдан иһэр диэн этэр.

Гаврил Неустроев, СӨ 2№-дээх балыыһатын ЛОР салаатын бырааһа: “Билигин урукку курдук 10-15 күн сыппат буолаллар. Билигин 4-5 күн буолла. Оннук курдук түргэнник эпэрээссийэ, эмтээһин барар”. 

Өрөспүүбүлүкэтээҕи 2 №-дээх балыыһа оторино-ларино-гологическай салаата Саха сиригэр соҕотох улахан дьон лор уорганнарын ыарыыларын эмтиир салаа буолар. Мэҥэ Хаҥалас улууһун Төҥүлү нэһилиэгиттэн сылдьар Семен Харитонов биир кулгааҕа истибэт буолан эпэрээссийэ ааста.

Семён Харитонов, Мэҥэ Хаҥалас улууһун олохтооҕо: “Эпэрээссийэм этэҥҥэ ааста. Бэйэм үчүгэйбин”.

Салаа 8 палатанан 30 куойка-миэстэлээх. Манна бүгүҥҥү күҥҥэ 10 быраас үлэлиир. Саамай тэнийбит ыарыыларынан отит, синусит, искэҥ ыарыылара буолаллар.  

Иннокентий Александров, СӨ 2№-дээх балыыһатын ЛОР салаатын сэбиэдиссэйэ: “Сыл аайы 1,5 тыһ. киһи киирэн эмтэнэн тахсар. Мурун, күөмэй, кулгаах ыарыыларын сэргэ оһол кэннэ эмтэнии үгүс”. 

Бу күннэргэ Саха сиригэр ЛОР-сулууспа төрүттэмитэ 75 сылын бэлиэтээтилэр. Үбүлүөйдээҕи тэрээһиннэр чэрчилэринэн научнай-практическай конференция, көрсүһүүлэр, маастар-кылаастар ыытыллыннылар.

Наталья Лебедева, СӨ доруобуйа харыстабылын министиэристибэтин кылаабынай оториноларинголога: “Биһиги сыл аайы конференция, семинар, маастар-кылаастары ыытабыт. Бэйэбит быраастарбытын үрдүк кылаастаах испиэлиистэргэ үөрэттэрэбит”.

Москваттан Оториноларинология национальнай научнай-чинчийэр кииниттэн профессор кэлэн маастар-кылаас, лазерынан эппэрээссийэ ыытан көрдөрдө. Профессор Ибрагим Нажмудинов 3 ыарыһахха куолайдарыгар үрдүк таһымнаах эпэрээссийэни оҥордо. 

Ибрагим Нажмудинов, ФМБА оториноларинологияҕа научнай-клиническай салаатын салайааччы: “Куолай эпэрээссийэтэ кэлин кэмҥэ олус сайынна. Үрдүкү технологияны туһаныы тэтимнээх. Эһиги өрөспүүбүлүкэҕитигэр бу хайысхаҕа элбэх үлэ ыытыллар. Олохтоох хирургтар лазерынан эпэрээссийэни баһылаабыттар. Биһиги бэйэбит уопуппутун үллэһиннибит”.

ЛОР салааҕа исписэлиистэринэн хааччыллыы тэрээһиннээхтик ыытыллар. Ол курдук сыл ахсын 200 быраас тустаах үөрэҕи, идэ таһымын үрдэтиини ааһар.