Дьокуускайдааҕы кадеттар оскуолаларын интернат дьиэтин тутуута бара турар
Сабыс саҥа кадеттар оскуолаларын кытта сыста уопсай дьиэтин тутуу бара турар. Үөрэнэр куорпус 200 миэстэлээх эбит буоллаҕына, интернат 125 миэстэҕэ анаммыт. Бу тас өттүгэр фасадын оҥоро сылдьаллар, уонча үлэһит күннэтэ түбүгүрэр. Интернат оскуолатын кытта үс этээстээх, уопсайа үөрэнэр куорпуһу тэҥҥэ алта аҥар тыһыынча квадратнай миэтэрэ иэннээх.
Интернат ис өттүгэр этээстэринэн дьүөрэлии араас хабааннаах үлэни ыыталлар. Турбалары сыбааркалааһын, плитка ууруута, сантехника, электрика тардыыта барар. Уопсай дьиэ бастакы этээһигэр куруһуоктары ыытар, сыньанар хостор, душ, интернеттаах уруок ааҕар хостор баар буолуохтара. Саҥа оскуолаҕа кадеттар уруоктарын кэннэ спордунан дьарыктаныахтара, ытарга үөрэниэхтэрэ, противогаһынан туһанары, квадрокоптеры ыытары баһылыахтара. Саҥа дьиэлэнэн кэлэр сылтан үөрэнээччилэрин ахсаана эбиллэрэ күүтүллэр.
Дария Кириллина, Дьокуускайдааҕы кадеттар оскуола-интернаттарын дириэктэрин иитэр үлэҕэ солбуйааччы: «Билигиҥҥи кэмҥэ 140 оҕо үөрэнэ сылдьар. Балаҕан ыйын бастакы күнүгэр үөрэнэр өттүбүтүн арыйбыппыт, ол иһин учууталларбыт, оҕолорбут өссө өрө күүрүүлээхтик үөрэнэ сылдьабыт. Уонна эһиил 200 оҕону ылыахтаахпыт».
Саҥа тутуу “Үөрэхтээһин” национальнай бырайыагынан тутуллар, үбүлээһин кээмэйэ - 600 мөлүйүөн солкуобай.
Тас өттүгэр территорияҕа оскуола байыаннай платцтаах, стадионнаах, мэһэйдээх балаһалаах буолар. Онон манна кадеттар аһаҕас халлаан анныгар эт-хаан өттүнэн сайдалларыгар бары усулуобуйа тэриллиэҕэ. Сүрүн болҕомто байыаннай-спортивнай бэлэмнэниигэ ууруллар.
Алексей Корякин, Дьокуускайдааҕы кадеттар оскуола-интернаттарын дириэктэрэ: «В данном интернате, кроме мест проживания предусмотрены все необходимые для детей помещения. Большое количество душевых, классы самоподготовки, лабаратории».
Бэлиэтээн эттэххэ, саҥа тутуу Уһук Илин үрдүнэн бастакы маннык хабааннаах үөрэх кыһата буолар күүтүллэр. Онон бу сыл бүтүүтэ кадеттар оскуоларын уопсай дьиэтэ үлэ үмүрүйэн үлэҕэ номнуо киллэрэр соруктаахтар.