Саха сирин баһаары утары охсуһар сулууспатын үлэһиттэрин спартакиадалара саҕаланна

Хамаанда бэриллэн, бойобуой таҥаһы кэтии түһүмэҕэ саҕаланар. Үгэскэ кубулуйбут баһаарынай-прикладной спорт көрүҥнэригэр сыллата ыытыллар спартакиада  быйыл Саха сирин баһаары утары сулууспата төрүттэммитэ 15 сылын чэрчитинэн ааһар. Бүгүн күрэх 40-с этэрээттэр, ол эбэтэр куорат таһынааҕы нэһилиэктэри уоттан харыстыыр чаастар икки ардыларыгар ыытыллар.

Афанасий Пухов, Дьокуускайдааҕы 16 №-дээх баһаарынай чаас салайааччытын солбуйааччы: «Бэйэбит этэрээппит иһинээҕи спартакиада буола турар. Бүгүҥҥү күҥҥэ 5 буолан кэллибит».

Бу баһаарынай спорт көрүҥэ дьиҥ, бу эйгэ үлэһиттэрин сулууспаларыгар күннэтэ туттуллар үөрүйэхтэр. Онон күрэхтэһии сүрүн сыала соруга - идэлээх дьон үлэлэрин хаачыстыбатын тупсарыы буолар. Ыксаллаах быһыы-майгы үөскээбит кэмигэр бу үөрүйэхтэр олус наадалаах буолаллар.  Куорат таһынааҕы Табаҕа баһаарынай чааһын байыаһа Геннадий Сергеев бу күн саамай түргэн, үчүгэй түмүктэри көрдөрдө.

Геннадий Сергеев, Табаҕатааҕы 11 №-дээх баһаарынай чаас үлэһитэ: «Бириэмэм 11,78 сек. Сэттэ буолан кэллибит. Сарсын атын дьоннор кэлиэхтээхтэр».

Бу күн уопуттаах, аҕа да, эдэр да үлэһиттэр кыттыыны ыллылар. Бу спорт көрүҥүн үгүс элбэх күрэҕэр кыттыыны ылбыт Тимофей Сергеев кэллиэгэлэрин кытары эмиэ илин-кэлин түсүһэр итиэннэ Өрөспүүбүлүкэтээҕи таһымнаах тэрээһиҥҥэ кыттыан сөптөөх байыастары көрөр.

Тимофей Сергеев, Жатайдааҕы 12 №-дээх баһаарынай чаас үлэһитэ: «Эдэр уолаттары көрөммүт сайыҥҥы күрэххэ талабыт. Мин Саха сирин сборнайыгар баарбын».

Быйылгы тэрээһин уратыта диэн бу сылга "Бастыҥ баһаарынай" диэн саҥа анал аат киирдэ. Күрэх түмүгүнэн 2024 сыл бастыҥ үлэһитэ биллиэҕэ.

Тыҥааһыннаах киирсиилэр 3-с күннэрин түмүгүнэн салгыы ким муниципальнай, онтон салгыы Өрөспүүбүлүкэтээҕи таһымнаах спартакиадаҕа барара биллиэҕэ.