Саха судаарыстыбаннай циркэтэ төрүттэммитэ 30 сыла

Арена иһэ биирдэ сырдыы, өрө көтөҕүллэ түһэр. Хас да көлүөнэ артыыстар биир сыанаҕа. Аан бастакы саҕалааччылар, Кытайга үөрэммиттэр, билиҥҥи үлэһиттэр уонна оҕо устуудьуйатын иитиллэччилэрэ. Кинилэри тапталлаах циркэлэрин үбүлүөйдээх тэрээһинэ түмэр. Бу манна сытар бүгүҥҥү кэнсиэр сүрүн сыала - 30 сыллаах сайдыы хаамыытын көрдөрүү.   

Мария Харлампьева-Попова, Марфа, Сергей Расторгуевтар ааттарынан СӨ судаарыстыбаннай циркэтин сүрүн режиссера: «Араас көлүөнэ артыыстара бары кытталлар. Эргэ циркэҕэ үлэлээбит артыыстарбыт кэлэннэр кытталлар».

Саха сиригэр цирк төрүттэниитигэр олук буолбут "Ойуун" синтез-тыйаатыр биир бастакынан түһүлгэҕэ тахсар. 30 тахса сыл аҥараа өттүгэр курдук артыыстар сөҕүмэр нүөмэрдэри бэлэхтииллэр. Циркэ искусствотын саха култууратын кытта дьүөрэлии тутар аатырбыт туруорууну көрөөччүлэр хас да сыллары уҥуордаан астына-дуоһуйа көрөллөр. Оттон уопуттаах артыыстар кинилэри солбуйар ыччаттан астыналлар.

Владислав Михайлов, Марфа, Сергей Расторгуевтар ааттарынан СӨ судаарыстыбаннай циркэтин артыыһа: «Оҕолору Кытайга Пекин куоракка үөрэтэннэр улахан исписэлиис буоланнар бу циркэбитин өрө тутан, сайыннаран, аан дойдуннан, Арассыыйанан уонна Сахабыт сиригэр циркэбитигэр элбэх дьону хомуйаллар».

Бары сөбүлээн көрөр клоуннарбыт циркэ искусствотын ураты уонна ыарахан көрүҥнэриттэн биирдэстэрэ. Ростислав Лебедев - Клоун Ростикс бу эйгэ тэриллиэҕиттэн үлэлиир. Дьоҥҥо үөрүүнү бэлэхтиир идэ кини олоҕун суола.

Ростислав Лебедев, Марфа, Сергей Расторгуевтар ааттарынан СӨ судаарыстыбаннай циркэтин артыыһа: «Цирк миэхэ ананан кэлбит быһылаах. Мин алдьархай интириэһиргиибин уонна күн бүгүҥҥэ дылы үлэлии сылдьабын, саҥаттан саҥаны арыйабын».

Саха сиригэр циркэ бастакы Президент Михаил Николаев уурааҕынан 1994 сыллаахха тэриллибитэ. Дьэ мантан саҕаламмыта тэтимнээх сайдыы. Аан дойду таһымыгар саха норуотун циркэтин аата ааттаммыта. Ол курдук үгүс бэстибээллэртэн, күрэхтэртэн кыайыы тохтоло суох кэлбитэ. Кытайга циркэ оскуолатыгар 3 бөлөх оҕо үөрэҕи ааспыта.

Сергей Расторгуев, Марфа, Сергей Расторгуевтар ааттарынан СӨ судаарыстыбаннай циркэтин дириэктэрэ, уус-уран салайааччыта: «30 сыл иһигэр балай да элбэх үлэни оҥордубут. Өссө төрдүс оҕолор бөлөхтөрүн тэрийэн Кытайга үөрэххэ ыытыахтаахпыт».

Үбүлүөйдээх тэрээһин хатыламмат ураты. Биир туруорууга - отут сыллаах ситиһии, инники кэскил бүтүннүү түмүллэр.