Дьокуускайга иккис Уһук Илиҥҥи норуоттар икки ардыларынааҕы ыччат форума ыытыллар

Хотугулуу Илиҥҥи университет геолого-разведочнай факультетын 5 кууруһун устудьуона Тимур Кириллов үөрэҕин таһынан уопсастыбыннай үлэҕэ көхтөөхтүк кыттар. Кини “Зема” диэн Өрөспүүбүлүкэ бары улуустарын ыччатын түмэр хамсааһыҥҥа баар. Тустаах форумҥа бэйэ түмсүүтүн кэпсии кэлбит. “Зема” хамсааһын сыллата үгүс тэрээһини ыччаттарга ыытар, биир сомоҕо буоларга угуйар диэн этэр.

Тимур Кириллов, "Зёма" ыччат хамсааһынын чилиэнэ: «Саамай улахан тэрээһиммит буолар бу сэтинньи ый бүтүүтүгэр “Өрөгөй” спорт комплекска. Боотурдар күрэхтэһиилэрэ диэн эдэр ыччат күрэхтэһиитэ. Уонна бу буолары турар тэрээһиммит “Тэтим” диэн. Лидердар оскуолалара курдук».

“Зема” уопсастыбыннай түмсүү күн бүгүн 1500 тахса ыччаты хабар. Оттон тустаах форум бу хамсааһыҥҥа өссө элбэх устудьуону угуйарга табыгастаах былаһаакка буолла. Тимур Кириллов билиһиннэрии лиэксийэтин үгүс устудьуон интириэһиргээн иһиттэ. Олор истэригэр үп-экономика институтун 1 курсун устудьуона Егор Алексеев баар. Кини эмиэ бэйэ үөлээннээхтэрин кытта билсээри-көрсөөрү, итиэннэ туһалаах иһитиннэриини истээри форумҥа кытта сылдьар.

Егор Алексеев, форум кыттыылааҕа: «Терроризм утары пропаганда ыытыахтаахпыт хайдах куһаҕанын билэллэрин курдук. Биир дойдуга олорор буоллахпыт ол иһин бары бииргэ буолуохтаахпыт уонна бэйэ бэйэбитигэр көмөлөһүөхтээхпит».

Форум бастакы күнүгэр сүрүн хайысха терроризмы уонна экстремизмы утары өйдөтөр-сэрэтэр үлэ буолла, итиэннэ дойдубутугар олорор бары норуоттар сомоҕолуу буолуохтаахтар диэн сыаллаах ыытылынна. Оттон ыччат форума Дьокуускайга үс күн устата ыытыллыаҕа. ХИФУ, АГАТУ уонна АГИКИ былаһааккаларыгар. Бу күннэр устата устудьуоннар араас тиэмэҕэ бэйэ бырайыактарын көмүскүөхтэрэ. Оттон бастыҥ үлэлэр талылланнар салгыы сайдалларыгар кыах бэриллиэҕэ.