Урбаан олимпиадатыгар сайаапка хомуйуута саҕаланна

Көрдөрүүгэ үөрэнээччилэр урбаан эйгэтигэр бастакы хардыыларын ситиһиитэ. 8 кылаас кыргыттара бройлер куурусса сымыытын сакаастаан аҕалтаран, чоппууска таһааран, номнуо ыыһаммыт бородууксуйаны атыыга таһаардылар. 90 сымыыты атыыласпыттарыттан 66-та тахсыбыт. Үөрэнээччилэр бу кэмҥэ урбаан ымпыгын-чымпыгын, суот-учуот өттүн бүтүннүүтүн баһылаатылар.

Айылгылаана Ефремова, Бэс Күөл агро-оскуолатын 8 кылааһын үөрэнээччитэ: "Биир үөлээннээхпин Степанова Сайаананы кытта чоппуускаларбытын көрөн-истэн улаатыннарбыппыт. Уонна бу билигин ыыһаммыт куурусса аҕаллыбыт көрдөрүүгэ". 

Кэс Күөл агро-оскуолата ааспыт сылтан грааннарга сүүйбүт үбүнэн "Бизнес-инкубатор" арыйан үлэлэтэр. Манна оҕо кыра сааһыттан бэйэ дьыалатын үлэлэтэргэ уһуйуллар. Ол курдук оскуола иһинэн түргэнник ситэр көтөр бородууксуйатын таһынан буора суох үүннэриллэр тэпэлииссэлээхтэр. Саха сирин отторуттан чээй оҥороллор итини сэргэ түргэнник буһар аһы  оҥорон нэһилиэнньэҕэ атыыга таһаараллар. 

Матрена Ефремова, Бэс Күөл агро-оскуолатын дириэктэрэ: "Оскуола 2006 сылтан агро-технологическай хайысханы тутуһан үлэлиир. Сүөһү тутабыт, бу сайыҥҥыттан көтөрү иитэн саҕалаатыбыт. Ааспыт сылга грааҥҥа сүүйбүт үппүтүнэн “Бизнес инкубатор” үлэлэтэбит". 

Бэс Күөл оҕолорун курдук урбаан эйгэтигэр сыстыан, бэйэлэрин бырайыактарын олоххо киллэриэн баҕалаах оҕолорго "Мин биисинэһим" киин олимпиада тэрийэр. Оҕо бэйэ дьыалатын кыра сааһыттан сайыннарыытыгар көдьүүстээҕин көрдөрбүт тэрээһин быйыл үһүс сылын ыытыллыа. Билигин сайаапкалары хомуйан саҕалаатылар. Олимпиада икки түһүмэхтээх ыытыллыа.

Анна Филиппова, "Мин биисинэһим" киин урбаан үөрэҕин салаатын салайааччы: "Кыайыылаах 50 тыһыынча солкуобайынан наҕаарадаланыа. Уосайа үс кыайыылааҕы олипиада түмүгүнэн быһаарыахпыт".  

Олимпиадаҕа 14 саастарыттан оҕолор кыттыахтарын сөп. Сайаапканы сэтинньи 20 күнүгэр диэри туталлар.