Көрбөттөр аан дойдутааҕы күннэрин чэрчитинэн ГАИ инспиэктэрдэрэ аахсыйа ыыталлар
Дьокуускай куорат олохтооҕо Сахаайа Данилова төрүөҕүттэн көрбөт. Кини өрөспүүбүлүкэтээҕи көрбөттөр бибилэтиэкэлэрин үлэһитэ. Тустаах аахсыйаҕа дьоруой уонна тэрийээччи быһыытынан кыттар. Сахаайа Данилова анал бэлиэ турар сиригэр суолу туоруур. Кини доруобуйаларынан хааччахтаах дьону суоппардар аһардаллар ду суох ду диэн тургутуу оҥордо. Маныаха күннээҕи олохпор суолу туоруурбур ыарахаттары көрсүбэппин эрээри, светофордар үлэлэригэр уларытыы киллэрэллэрэ буоллар диэн баҕа санаалаах.
Сахаайа Данилова, Өрөспүүбүлүкэтээҕи көрбөттөр библиотекаларын исписэлииһэ: «Суол туорааһыныгар улахан ыарахаттары көрсүбэппин, ол эрээри саҥарар светофордар элбииллэрэ буоллар диэн баҕа санаа баар. Ол биһиэхэ улахан көмө буолар уонна дьон болҕомтотун тардар дии саныыбын».
Көрбөт дьоҥҥо туһуламмыт аахсыйа иитинэн ГИБДД инспиэктэрдэрэ суоппардары тохтотон көрбөт сатыы сылдьааччы диэн анал бэлиэни билэллэрин туһунан туоһуластылар итиэннэ доруобуйаларыгар хааччахтаах дьоҥҥо ордук болҕомто ууралларыгар сүбэлээтилэр.
Көрбөт сатыы сылдьааччы диэн анал бэлиэни үгүс суоппар билэр, ол эрэн киин куорат ханнык уулуссаларыгар баалларын үчүгэйдик өйдөөбөттөрүн биллэрдилэр.
Тустаах аахсыйа сыллата көрбөттөр аан дойдутааҕы күннэрин баттаһа ыытыллар. Харахтарынан доруобуйаларыгар хааччахтаах дьон ордук бу суолу туоруулларыгар, уулуссаҕа куттала суох хаамалларыгар усулуобуйаны олохтуур туһугар бары кыһаллыахтаахпыт.
Владилена Охлопкова, Дьокуускай куорат суол-иис инспиэксийэтин пропагандаҕа салаатын инспиэктэрэ: «Суоппардарга туоһулаан эттибит. Маннык дьоннору көрөр буоллахтарына сатыы туоруур сирдэргэ булгуччу тимир көлөлөрүн тохтотон бу киһи туоруор дылы тохтоон туруохтаах. Уонна көмө наада буоллаҕына тахсан көмөлөһүөхтэрин сөп»
Киин куоракка уопсайа 500 тахса көрбөт киһи олорор. Бу алтынньы ый 15 күнүттэн өрөспүүлүкэ үрдүнэн кинилэргэ туһуламмыт "Үрүҥ торуоска" декадата саҕаланна. Үгүс тэрээһиннэр көрбөттөр өрөспүүбүлүкэтээҕи бибилэтикэлэригэр ыытыллыаххтара.
Евгения Потапова, Өрөспүүбүлүкэтээҕи көрбөттөр библиотекаларын исписэлииһэ: «Көрсүһүүлэр, аахсыйалар. Ону таһынан араас кэнсиэрдэр да буолаллар».
Үрүҥ торуоска ыйынньыга сэтинньи 13 күнүгэр диэри ыытыллыаҕа. Ол эрэн бу кэмҥэ эрэ буолбакка күннэтэ доруобуйаларынан хааччахтаах дьоҥҥо ураты болҕомтолоох буоларбыт ирдэнэр.