Дьокуускайга Арассыыйа Дьоруойун Родимир Максимовы чиэстээтилэр
Саха сиригэр өссө биир үрдүк ааттаах Арассыыйа Дьоруойун - Родимир Максимовы чиэстээтилэр. Таатта улууһун Туора Күөл нэһилиэгин олохтооҕо Родимир Максимов дьоруойдуу быһыытын Саха сиригэр эрэ буолбакка Арассыыйа барыта билэр. Кини киирсии кэмигэр төһө да бааһырбытын иһин, этэрээти салайыыны бэйэтигэр ылан, икки суукка тухары тирэх пууну көмүскээбитэ.
Родимир Максимов Ийэ Дойду туһугар бэриниилээхтик киирсэр кэмигэр дьоруой буолуом диэн санаабатаҕын, үрдүк наҕараада чэпчэкитик кэлбэтэҕин үллэстэр.
Родимир Максимов, Россия Дьоруойа: «Үрдүктүк сыаналаабыттарыгар махтанабын. Онно уолаттарым эмиэ үөрэллэр. Мин эрэ мэдээлим буолбатах, олохторун ууран туран инники кирбиигэ киирбит уолаттар мэдээллэрэ буолар».
Өрөспүүбүлүкэ саалата толору. Чугас дьонноро, аймахтара, доҕотторо уолларын көрсө, үөрүүнү бииргэ үллэстэ кэлбиттэр. Саамай кырачааннара 11 саастаах Вадим Максимов. Кини дьоруой бииргэ төрөөбүт кыра быраата. Убайынан киэн туттарын уонна улаатан баран кини курдук буолуон баҕарарын этэр.
Вадим Максимов, Россия Дьоруойун быраата: «Убайым мэдээл ылбытын иһин наһаа үөрдүм. Убай үчүгэй, наар үлэлиир, миигин наар көрөр этэ».
Арассыыйа Дьоруойа бииргэ төрөөбүттэрэ төрдүөлэр, Родимир иккис уол оҕо буолар. Дьоруой ийэтэ Варвара Максимова Родимиры кыра эрдэҕиттэн эр дьон ортотугар үлэни өрө тутан улааппытын, үлэнэн хатарыллыбытын бэлиэтиир.
Варвара Максимова, Россия Дьоруойун ийэтэ: «Кыра эрдэҕиттэн бултка, от үлэтигэр сыстаҕас».
Хорсун быһыы, күүстээх санаа, үлэттэн, ыарахаттартан толлубакка инники диэкки баран иһэр диэн дьоруой чугас дьонноро кэпсииллэр.
Анна Кузьмина, Россия Дьоруойун эбээтэ: «Кини наһаа аһыныгас уонна эппит тылын толорорун гына иитэ сатаабыппыт».
Саха хорсун уола Родимир Максимов - тохсус Дьоруой буолар. Саха сирэ барыта Дьоруойдарынан киэн туттар
Александр Колесов, Россия Дьоруойа: «Арассыыйаҕа улахан таһымҥа сылдьабыт. Уолаттар хорсун быһыыларын аан дойду барытын көрөр-истэр уонна киэн тутталлар».
Саха хорсун уолаттара, дойду көмүскэлигэр дьоһуннаах быһыыларынан холобур буолаллар. Онуоха дьоруойбут ахсаана элбиирэ туоһулуур.