Саха сиригэр хаарбах дьиэттэн көһөрүү салҕанар

Тыа сиригэр баараҕай тутуу. Хаҥалас улууһун Өктөм нэһилиэгэр 5 этээстээх элбэх кыбартыыралаах саҥа дьиэ тутулла турар. Аны эһиил манна 80 тахса ыал киирэн малааһынныаҕа. Тустаах эбийиэк аварийнай уонна хаарбах туруктаах дьиэттэн көһөрүү бырагыраамманан тутуллар. Билигин үлэ ортолоон эрэр, түннүктэри туруоран, сотору кэминэн фасады оҥорууга киириэхтэрэ.

Пётр Архипов, бэдэрээтчит: «Былырыын тутууну 3 кыбаарталга саҕалаабыппыт. Дьиэбит этэҥҥэ хоруопката бүтэн, түннүгэ туран билигин фасадка тахсаары сылдьабыт. Онтон кыһынын сылытыы ситимин киллэрэн иһинээҕи үлэҕэ киириэхтээхпит».

Былаан быһыытынан эбийиэк быйыл үлэҕэ киириэхтээх этэ. Ол эрэн кэккэ кыһалҕалар үөскээннэр,болдьохтон хаалыы бэлиэтэнэр. Бу сүрүннээн тутуу матырыйаалын тиэйии-таһыы тардыллан үлэ бытаарбыт.

Пётр Архипов, бэдэрээтчит: «Уруккута күөл сыппыт сирэ буолан сыбаайаны толору ноҕоруускалаабакка турабыт. Оннук түгэннэр бааллар. 4-үс, 5-ис этээстэрбитин кылааккалаабакка сылдьабыт».

Ол да буоллар үлэ тохтообот, бэдэрээтчит эбийиэгин үрдүк хаачыстыбалаах уонна сүрүннээн кыһынын дьиэ иһэ сылаас буоларыгар болҕомтотун уурар. Итиэннэ тутууга араас аныгы технологияны туһанар. Манна даҕатан эттэххэ, үгүс улууска билигин хаарбах уонна аварийнай дьиэттэн көһөрүү бырагыраамманан тутуу үлэтэ ыытыллар.

Евгений Степанов, Саха сирин дьиэ тутуутугар дирекциятын салайааччытын солбуйааччыта: «Улуустарга эмиэ улахан тутуу бара турар. Алдан улууһугар 7 дьиэ тутулла турар, быйыл киириэхтээхтэр. Хаҥаласка, Намҥа, Уус Алдаҥҥа тутуулар эмиэ бара тураллар».

Оттон киин куоракка тустаах бырагыраамманан ордук элбэх дьиэ Звезднай дьоҕус түөлбэҕэ тутуллар. Манна 2025 сылга диэри 500-чэкэ квартира бэриллиэхтээх. Күн бүгүн 7 дьиэ үлэҕэ киирдэ.

Семён Потапов, СӨ ипотекаҕа агенствотын көһөрүүгэ отделын салайааччыта: «Өссө үс дьиэ тутулла турар. Билиҥҥи тутуллубут дьиэлэргэ 500-тэн тахса кыбартыыра биэриэхтээхпит. Билигин бу хамыыһыйалар көрөн ол кыбартыыралары тута тураллар. Билиҥҥи туругунан 200-чэ кыбартыыраны биэрдибит».

Бу сыл бүтүөр диэри барыта 60 тыһ. тахса олохтоох олорор усулуобуйатын тупсарыахтаах. Бэлиэтээн эттэххэ, ааспыт сылга Саха сиригэр олорор дьиэни тутуу муҥутуур сыыппараҕа тиийбитэ. Ол курдук, 705 тыһ тахса кв. миэтирэ иэн үлэҕэ киирбитэ. Быйыл да тэтими ыһыктыбакка үлэ салҕанар.