Киинэ көрөр 40 саала арылынна

Үөрүүлээх арыллыы, ытыс дохсун тыаһа. "Экстра синема" бырайыак тэҥинэн 40 нэһилиэккэ киинэ саалатын арыйар. Ол аата 70 тыһыынчаттан тахса киһи  улахан экраҥҥа киинэ көрөр кыахтанар. Саха сиригэр эрэ буолбакка бүтүн дойду үрдүнэн бэлиэ түгэҥҥэ быһа сибээскэ 40 саала холбонон олорор. Сүрүн тэрээһин саха киинэтин сайдыытыгар улахан оруоллаах  Хаҥалас улууһун Төхтүр нэһилиэгэр ыытыллар.   Кинилэри Ил Дархан Айсен Николаев эҕэрдэлиир.

Айсен Николаев, СӨ Ил Дархана: “Сахабыт өрөспүүбүлүкэтигэр киинэ көрөр 40 саҥа сир “Экстра Синема” технологиянан арылларынан эҕэрдэлиибин”.

"Экстра Синема" бырайыак өрөспүүбүлүкэҕэ үлэлээбитэ 2 сыл буолла. Бу иннинэ 30 нэһилиэккэ киинэ көрдөрөр саала пилотнай бырайыак быһыытынан үлэлээтэ. Итиэннэ олохтоох оҥорон таһаарыы хайа баҕар өттүнэн табыгастааҕын уонна көдьүүстээҕин көрдөрдө. Онон олоххо тэтимнээхтик киирэр кыаҕын ылла. 

Петр Чиряев, "Экстра Синема" хампаанньа генеральнай дириэктэрэ: “Быйыл номнуо 40 саала. Оттон эһиилгиттэн Арассыыйа үрдүнэн тыһыынчанан саала арыйар былааннаахпыт”.

Төхтүр 100 миэстэлээх саалата тобус толору. Кинилэр уонна бу күн холбоммут нэһилиэктэр тэҥинэн режиссер Михаил Лукачевскай "Кыталыктаах кырдалым" диэн киинэтин босхо көрдүлэр. Улахан экраҥҥа үрдүк хаачыстыбалаах устууну олохтоохтор астына сэҥээрдилэр.

Матрена Ефремова, Төхтүр олохтооҕо: “Биһиги көлүөнэ урукку кэмҥэ киинэ көрөн, сэргээн сырыттахпыт. Ол түгэн билигин нэһилиэккэ кэлэрэ сүрдээх үчүгэй. Ыччаттар даҕаны киинэҕэ сылдьыахтара”.

Анастасия Перловская, Төхтүр олохтооҕо : “Оҕолорбут киин куорат киинэ тыйаатырдарыгар буола турар киинэлэри тэҥҥэ көрүө этилэр. Маннык арыллара олсу үчүгэй, нэһилиэнньэ үөрэ-көтө көрсөр”.

Саха сиригэр таҥыллар киинэ проектора ураты кыахтааҕын айан таһаарааччылар этэллэр. Холобур, сыана өттүнэн ыллахха, мөлүөйүөнү куоһарбат, ол аата тас дойду оҥоһуутунааҕар биэс төгүл чэпчэки. Киинэ тыйаатырын ирдэбилигэр толору эппиэттиир, билиэти тэйиччиттэн олорон атыылаһар кыах холбоно сылдьар.

Онон технологияны үлэлэтэргэ  саала уонна куйаар ситимигэр холбонуу эрэ ирдэнэр. Бырайыагы салгыы Арассыыйаҕа тарҕатар сорук турар. Тэрилтэ быйылгыттан "Национальнай технологиялы көҕүлээһин" пуонда уонна Ил Дархан  өйөбүлүнэн үлэлиир.