Чөмпүйүөннүүн сарсыардааҥҥы дьарык
"Юность" стадиоҥҥа устудьуоннарга сарсыардааҥҥы эрчиллии. Ол эрэн, бу ураты, чөмпүйүөннүүн дьарык буолла. Кикбоксиҥҥа Россия икки төгүллээх кыайыылааҕа, спорт маастара Михаил Иванов ыччаттарга эти-хааны уһугуннарар, чэбдигирдэр итиэннэ кикбоксердар анал эрчиллиилэрин көрдөрдө. Маны тэҥэ спортка саҥа хардыыларын оҥорооччуларга туһалаах сүбэлэри биэрдэ.
Михаил Иванов, кикбоксиҥҥа Россия икки төгүллээх чөмпүйүөнэ, Россия спордун маастара, тренер: "Былчыҥы сайыннарар, сүһүөхтэри эрчийэр хамсаныылары оҥоттордум. Оҕолор сөбүлээтилэр быһылаах. Бэйэлэригэр тугу эмэ ылыныахтара диэн эрэнэбин. Күнүм таһаарыылаах буоларын туһугар сарсыарда сэрээккэ оҥоробун уонна дьону эти-хааны уһугуннарар сэрээккэни оҥорун диэн ыҥырабын”.
“Чөмпүйүөннүүн сарсыардааҥҥы дьарык" Саха сирин ыарыыны эрдэттэн сэрэтиигэ медицинэ сулууспатын 85 сыллаах үбүлүөйүгэр анаммыт тэрээһиннэр иитинэн ыытылынна. Чөл олоҕу сырдатыыга, эти-сиини чэбдигирдэргэ туһуланна. Оттон оскуола оҕолоругар анаан араас профориентационнай тэрээһиннэр буолаллар. Ол курдук Дьокуускайдааҕы 39 нүөмэрдээх оскуолаҕа саахалга түбэспиттэри быыһыыр өрөспүүбүлүкэтээҕи медициинэ киинин иһинэн үлэлиир оскуола уһуйааччылара оҕолорго бастакы суһал көмөнү оҥорорго маастар-кылааһы ыыттылар.
Исписэлиистэр бастакы көмөнү оҥорон көрдөрдүлэр итиэннэ улахан экраҥҥа презентация быһыытынан кэпсээтилэр. 9 кылаас үөрэнээччитэ Петя Антонов лиэксийэни сэҥээрэн истэр.
Пётр Антонов, Дьокуускайдааҕы 39 №- дээх оскуола 9-с кылааһын үөрэнээччитэ: “Бастакы суһал көмөнү хайдах оҥорору эрдэ билэр этим, ол эрэн маастар-кылааска билиибин өссө кэҥэттим”.
Оттон бу 39-с нүөмэрдээх оскуола естественнай наукалары дириҥэтэн үөрэтэр хайысхалаах. Онон бу маннык курдук маастар-кылаастар тиһигин быспакка ыытыллаллар. Маны тэҥэ медициинэ тэрилтэлэригэр куруутун араас экскурсияларга сылдьаллар.
Варвара Хатылыкова, Дьокуускайдааҕы 39 №- дээх оскуола дириэктэрин иитэр үлэҕэ солбуйааччы: "Биһиги оскуолабыт биир сүрүн хайысхата - медициинэ. Маныаха оборуудабанньаннан толору хааччыллыылаах кылаас баар. Ааспыт сылтан биһиги оскуолабыт Медициинэ колледжын кытта сөбүлэҥ түһэрсэн үлэлиибит. Ону тэҥэ оҕолорбут Дьокуускай араас тэрилтэлэригэр экскурсияҕа сылдьаллар".
Медициинэ эйгэтигэр сыһыаннаах оскуола үөрэнээччилэрэ буолан, оҕолор маастар-кылааһы сэҥээрэн иһиттилэр. Теория кэннэ аны бэйэ анал кабинеттарыгар практикаҕа холонуохтара.