Хаппыыста хомуура саҕаланна

Быйыл хаппыыстаҕа өҥ дьыл. Уп-улахан астар бааһынаны биир гына төкүнүһэ сыталлар. Оҕуруоччут Маргарита Капитонова бу көрүҥ оҕуруот аһын үүннэриигэ улахан уопуттаах, ол иһин үүнүүлээх дьылы мүччү туппакка быйыл үрдүк көрдөрүүнү ситиспит. Бу саас барыта 4,5 гектар иэннээх сиргэ хаппыыста олорбут. Билигин дьэ ситэн хомуур тэтимнээхтик барар. 

Хаппыыста илиинэн эрэ хомуллар. Онон хаһаайыстыба сыл аайы нэһилиэнньэттэн баҕалаах дьону көмөлөһүннэрэр. 20 куулу хомуйдахха биири бэйэҕэр ылаҕын. 

Владимир Кривогорницын, Тулагы олохтооҕо: "Сыл аайы маннык кэлэн көмөлөһөбүт. Бэҕэһээ 63 куулу оҥорбуппут. Бүгүн 20 тахса гынныбыт". 

Тулагы быйаҥнаах сиригэр үүммүт хаппыыста оҕо аһылыгар барар. Ол эбэтэр оскуолаларга, уһуйааннарга тарҕанар.  Маргарита Капитонова бааһынай хаһаайыстыбата оҕуруот аһын үүннэриинэн дьарыктаммыта быйыл 8-с сыла.  Сыл аайы кыра-кыралаан  көрүҥнэрин, суортарын  элбэтэн иһэллэр. Быйыл 12 гектарга хортуоппуй олордуллубутуттан суорт-суорт араас үүнүүнү биэрдэ.

Маргарита Капитонова, бааһынай хаһаайыстыба салайааччыта: "Хаппыыстаны дьэ саҕалаатыбыт. Бу нэдиэлэни быһа хомуйарбыт буолуо. Саастан быһа бүөбэйдээн маннык үүнүүнү ыллыбыт".

Хаһаайыстыба Сүрүннээн "мегатон" уонна "ринда" диэн суортары олордор. Бу хойут ситэр тууһуурга аналлаах хаппыыста. Аһа бөдөҥ уонна кытаанах буолар.

Ирина Федорова, Сыырдаах олохтооҕо: "Бу суорт тууһуурга наһаа барар эбит. Дьиэбэр илдьэммин кырбаан сиэн көрбүтүм наһаа үчүгэй хаппыыста. Туох да үөнэ суох. Урут биһиги үүннэрэр эрдэхпитинэ үөннэнэр аҕай этэ". 

Онтон бу көстөр икки гектар иэннээх сиргэ моркуоп хомуура барар. Хомуурга агротехнологическай университет устудьуоннара көмө буолаллар. Инникитин оҕуруот аһын үүннэриини идэ гыныахтаах оҕолор хаһаайыстыбаны кытта дуогабардаһан үлэлииллэр. Быйыл моркуоп үүнүүтэ эмиэ өлгөм буолан хаһаайыстыбалаахтар астынан сылдьаллар. Ол аата битэмииннээх олохтоох оҕуруот аһа быйыл дэлэй буолар.

Маргарита Капитонова, бааһынай хаһаайыстыба салайааччыта: "Бу суорду сөбүлээтибит аҕай. Уһун уктаах буолар, аһа кылгас буолан баран суон. Амтана олус минньигэс".

Маргарита Капитонова хаһаайыстыбата икки көрүҥ моркуобу олордор. маны тэҥэ уга кылгас буолан баран уһун астааҕы үүннэрэр. Үгүс сыллаах кэтээн көрүү кэннэ бу суортарга тохтообуттар. Амтана үчүгэйинэн, харайыытынан атыыга хамаҕатык барыытынан .

Хомуур үлэтэ балаҕан ыйын бүтүүтэ түмүктэниэ. Ол кэннэ бааһынай ырыынагар атыыга тахсыа.