Дьокуускай куорат төрүттэммитэ 392 сылын бэлиэтиир тэрээһиннэр аастылар

Ирина Гольдерова: «Бүгүн Дьокуускай куорат төрөөбүтэ 392 сылын бэлиэтиир. Бу күн киин куоракка араас хабааннаах тэрээһиннэр ыытыллыахтара. Ол курдук: болуоссаттарга кэнсиэрдэр, быыстапкалар, куонкурустар, итиэннэ норуот маастардарын быыстапкалара эмиэ. Төһө да халлаан тымныытын үрдүнэн дьон-сэргэ элбэх».

Болуоссат, уокурук аайы кэнсиэр, ас-үөл атыы-эргиэн дьаарбаҥката, айар талааннаахтар быыстапкалара, уруккуну-билиҥҥини кэрэһэлиир хаартыскалар, уруһуйдар дьон дьүүлүгэр турдулар. Дьокуускай куорат күнүн көрсө Мииринэй улууһуттан Сардаана Андреева норуот маастардарын быыстапкатыгар кытта кэлбит. Куорат күнүн көтүппэккэ сылдьа сатыыбыт, сылын аайы куораппыт тупсан иһэрэ үөрдэр диэн кэпсиир.

Сардаана Андреева, норуот маастара: «Мэлдьи тутуу бара турарыттан ис дууһабыттан үөрээбин. Ленин болуоссатыгар сэргэхсийбит, сырдаабыт уонна архетиктурата тупсубут».

Эдэр ыччакка, кырачааннарга хас да хайысханан арахсан элбэх былаһаакка үлэлээтэ. Дьокуускай куорат кэлэр кэскилэ, 6-с кылаас үөрэнээччитэ Егор Нахунаев саамай сөбүлүүр уонна оонньуур сирэ куорат паарката буолар. Быйыл пааркаҕа саҥардыы үлэтэ ыытыллыбыта, онон пааркабыт өссө тупсубут, сырдаабыт диэн этэр.

Егор Нахунаев, Дьокуускай куорат олохтооҕо: «Бэстээххэ дылы муоста туталларын күүтэбин, саҥа дьиэлэри, пааркалары».

Олохтоохтор, ыалдьыттар тэрээһиннэргэ көхтөөхтүк кыттыыны ыллылар. Сылын аайы куораппыт тупсан, сайдан иһэр диэн санааларын үллэстэллэр.

Дьокуускай куораты сайыннарыыга, куорат социальнай-экономичэскэй балаһыанньатын ырытан, кэлимник чинчийэн, куорат 2030 сылга диэри сайдар маастар-былаана бигэргэнэн үлэлии турар. Ирбэт тоҥҥо турар Дьокуускай куорат дьон-сэргэ олороругар, үлэлииригэр, үөрэнэригэр бары өттүнэн табыгыстаах уонна сайдыылаах буолуохтаах.

Евгений Григорьев, Дьокуускай куорат баһылыга: «Былырыын Бэрэсидьиэн Владимир Путин өйөөһүнүнэн маастар-былаан ылыммыпыт, ол былаанынан биир сыл үлэлээтибит. Билиҥҥи туругунан Дьокуускай куоракка 23 бырайыак оҥоһулла турар. Ол курдук, бастакы оскуола дьиэтэ, Роман Дмитриев набережнайа, Ленин болуоссата уонна Сайсары күөлбүт оҥоһулла тураллар. Оннук курдук 90 бырайыагы биһиги 2030 сылга дылы оҥоруохтаахпыт».

Дьокуускай куорат төрөөбүт күнэ киэҥ далааһыннаахтык ааста. Бырааһынньыктааҕы тэрээһиҥҥэ элбэх киһи муһунна. Аны 8 сылынан Дьокуускай куорат 400 сыллаах үбүлүөйүн көрсө сайдыыга, эйгэни тупсарыыга улахан сыал-сорук туруоруллунна.