Саха сиригэр хаарбах дьиэлэртэн көһөрүү бырагырааматын иккис түһүмэҕэ үлэлиир

Хаарбах дьиэлэртэн көһөрүү бырагырааматын быйылгы сыллааҕы былаана. 140 тыһ. кв.м. көтүрүллүөхтээх, 8 тыһ. кэриҥэ киһи саҥа дьиэлэниэхтээх. Маныаха, олохтоох муниципальнай тэриллии  уонна эрэгийиэн биир тэтимнээх, киэҥ хабааннаах  үлэтин түмүгэр сыал-сорук ситиһиллэр. Былааннаммыт үлэ күн бүгүн болдьох быһыытынан ыытыллар.

Евгений Степанов, СӨ олорор дьиэлэри тутуу Дирекциятын генеральнай дириэктэрин солбуйааччы: «Быйылгы былааммытынан, сыл саҕаланыаҕыттан 40 курдук саҥа дьиэни үлэҕэ киллэрдибит. Сыл бүтүөр диэри өссө 60 дьиэни киллэриэхтээхпит. Улуустарга саамай улахан тутуу Алдан, Мэҥэ Хаҥалас уонна Томпо оройуонарыгар бара турар».

Ол эрэн атын улуустарга тутуу барбат диэн өйдөбүл - тутах. Хас биирдии улууска 1-2 тутуу син баар диэн олорор дьиэлэри тутуу Дирекцията иһитиннэрэр. Хаарбах дьиэлэртэн көһөрүү бырагырааматын биир баараҕай бырайыага. Олохсуйарга бары усулуобуйаны үөскэппит Комплекснай тутуу - Звезднай микрооройуон. Ааспыт сылга  7,  быйыл эмиэ оччо элбэх кыбартыыралаах дьиэлэр тутулуннулар. Өссө сыл бүтэһигэр диэри 1 дьиэ былааҥҥа баар. Хаарбах дьиэлэртэн көһөрүү испииһэгэр киирбит олохтоох бастатан туран бэриллэр усулуобуйаҕа быһаарыныы ылыныахтаах.

Владимир Егоров, СӨ олорор дьиэлэри тутуу Дирекциятын программалары олоххо киллэрии салаатын начальнига: «Харчынан дуу эбэтэр саҥа кыбартыыраҕа көһөбүн дуу диэн толкуйданыахтаахтар. Ону билэн, үчүгэйдик толкуйдаан баран дьаһалталарыгар этиэхтээхтэр. Харчынан ыларга кыбартыыраларын сыаналаттараллар».

2025 сылтан хаарбах дьиэлэртэн көһөрүү бырагырааматын 3 түһүмэҕэ саҕаланыаҕа. Манна 2022 сылга диэри хаарбах туруктаах ааты ылбыт дьиэлэр киириэхтэрэ. Оҥоһуллар үлэ иэнэ 2-с түһүмэхтэн хаалсыбат, хабаана өссө киэҥ диэн номнуо биллэр. Ол эрэн бырагыраама үлэтигэр уларыйыылар баар буолуохтара. Бу барыта билигин ырытыыны ааһар. 

Евгений Степанов, СӨ олорор дьиэлэри тутуу Дирекциятын генеральнай дириэктэрин солбуйааччы: «Өрөспүүбүлүкэ үрдүнэн 2,8 тыһ. тахса дьиэ киирэрэ былааннанар. 1 089 000 кв.м. хаарбах дьиэ көһөрүллүөхтээх саҥа бырагырааманан».

Бу курдук сыыйа, өрөспүүбүлүкэ үрдүнэн хаарбах дьиэ ахсаана аччыыр. Аны аҕыйах сылынан, аҥардас Дьокуускай куоракка Звезднай микрооройуону таһынан Спортивнай, Аэропорт оройуоннара дьэндэйиэхтэрэ.