Дьокуускайга дойду нацбырайыактарынан социальнай эбийиэктэр тутуулара барар

Дьокуускайга Сэргэлээх суолун 12 км доруобуйаларынан хааччахтаах оҕолорго социальнай адаптацияны ааһалларыгар идэлээх үөрэхтээһини ыытар саҥа адаптивнай комплекс тутулла турар. Тутуу ааспыт сыл күһүҥҥүтүттэн саҕалаан барар. Мана 550 үөрэнээччилээх анал коррекционнай оскуола, 200 миэстэлээх уһуйаан уонна улуустартан сылдьар үөрэнээччилэр олороллоругар 150 миэстэлээх интернаттаах буолуоҕа. Дойду үрдүнэн аан бастакы маннык хайысхалаах адаптивнай комплекс “Үөрэҕирии” национальнай бырайыак чэрчитинэн тутуллар. 

Фёдор Попов, "Главстрой" тэрилтэ толорооччу дириэктэрэ: «Бетон үлэтэ бара турар, истиэнэ ууруута, иһинээҕи үлэлэр тэҥҥэ бара тураллар. Эбийиэккэ 160 киһи үлэлии сылдьар. Алтынньы ыйга ититии биэрэр былааннаахпыт».

Уопсайа 17 тыһ.кв. иэннээх тутуу куорпустарынан арахсыаҕа. Коррекционнай оскуола иэнэ 9,5 тыһ.кв.м., ол эбэтэр бу комплекс бастакы уочарата быйыл - сыл бүтүүтэ үлэҕэ киирэрэ күүтүллэр, онтон уопсайынан бары тутуу - детсад, интернат эһиил балаҕан ыйыгар түмүктэниэхтээх. Онон Саха сирин доруобуйаларыгар хааччахтаах оҕолор үрдүк таһымҥа эппиэттиир үөрэнэр дьиэлэниэхтэрэ. Өссө биир бэдэрээлинэй бырайыак көмөтүнэн Дьокуускайга общественнай сир оҥоһуллар. Ол курдук “Комфортная, городская среда” бырайыагынан герой Федор Попов аатынан искибиэр баар буолуоҕа. Дзержинскай уонна кини аатын сүгэр уулусатыгар силбэһиилэригэр тутуллан номнуо балаҕан ыйыгар бэлэм буолара күүтүллэр.

Федора Алексеева, СӨ баһылыгын иһинэн архитектура уонна куораты тутуу салалтатын бырайыактыыр салаатын салайааччы: «Искибиэр Арассыыйа үрдүнэн ыытыллыбыт куоластааһыҥҥа кыайан быйыл тутулларга кыах ылбыта».

Искибиэргэ олорон сынньанарга скамейкалардаах, дьоҕус архтектурнай формалаах буолуоҕа. Манна билигин сиригэр таас кутан оннун бэлэмнээбиттэр. Номнуо балаҕан ыйыгар дьоҥҥо-сэргэҕэ анаан аһыллыахтаах. Оттон эһиил бу искибиэргэ сахаттан бастакы герой Федор Попов пааматынньыгын туруоруохтара. Киин куоракка бу курдук тутуу-оҥоруу көхтөөхтүк ыытыллар. Ордук суолга-иискэ улахан болҕомтону уураллар. Намныыр суолга улахан өрөмүөн үлэтэ иккис сылын бара турар.

Гаврил Рожин, "Дороги Саха" тэрилтэ сүрүннүүр инженерэ: «Нам суолун 3,2 км саҥардыы үлэтин ыытабыт. Аспаал бастакы араҥатын 350 м уурарбыт хаалла».

Оҥоһуллар суол кэҥээн улаатан, 4 балаһалаах буолуоҕа. Ортотунан балаһалары араарар ограждениелаах, суол икки өттүттэн туһаанаах сырдатыылаах буолуоҕа, онон уот баҕаналарын туруоруохтара. Сатыы сылдьааччыларга эмиэ усулуобуйа оҥоһуллуоҕа, ол курдук тротуардар, светофордар, автобус тохтобуллара киириэхтэрэ. Аспаалы уурууну кытта дьүөрэлии тупсарыы үлэлэрэ бараллар. Уопсайа 3 км. тахса усталаах саҥа суол аны күһүн барыта түмүктэниэхтээх.