Жатайдааҕы техникуму бүтэрэн 74 устудьуон сиэстирэ идэтин баһылаата

Кыһамньылаах устудьуон Мария Шербина үөрэммит сылларын тухары иҥэриммит билиитин, сатаабыт сатабылын эспиэрдэргэ көрдөрөр. Талбыт идэтин эйгэтигэр быһаарсар, үлэтин сөптөөхтүк оҥорор диэн туоһулуур докумуон ылан исписэлиис аатын сүгээри тиһэх экзээмэни, ол эбэтэр аккредитацияны ааһар. Устудьуон талбыт идэм олус туһалаах, тус олохпор даҕаны наадалаах диэн сэһэргээтэ.

Мария Шербина, устудьуон: «Бэйэбитигэр даҕаны, дьоҥҥо көмөлөһөрбүн сөбүлүүбүн. Оҕолордоохпун, дьоннорбор игин наада буолуо».

Устудьуоннар тиһэх тургутууларын санныларыгар үгүс уопуттаах, бэйэлэрэ сиэстирэ, быраас идэлээх эспиэрдэр туталлар. Идэ эйгэтигэр үлэлии-хамсыы сылдьар киһи устудьуоннар билиилэрин, сатабылларын тургутара ордук диэн сэһэргииллэр.

Анна Бетюнская, 1 №-дээх Өрөспүүбүлүкэтээҕи балыыһа сиэстэрэтэ, сүрүн эспиэр: «Салайар эрэ каадыр буолбакка, боростуой үлэһит диэн буолар. Кинилэр үлэлии сылдьар дьоннор буоллахтара. Барытын билэр дьоннор».

Жатайдааҕы үөрэх кыһата Саха сирин медициинэтэ сайдарыгар улахан кылааты уурар. Бу техникуму бүтэрэн баран араас улуустарынан үлэлии-хамсыы барар киһи ахсаана үгүс. Онон сиэстирэ идэлээхтэр өрөспүүбүлүкэ араас муннуктарынан бараары кынаттарын куурдуналлар. Бэрт табыгастаах кыһа диэн устудьуоннар, уһуйааччылар уонна быраас идэлээхтэр санааларын үллэстэллэр.

Никифорова Александра Жатайдааҕы техникум үөрэх салаатыгар сэбиэдиссэйэ: «Биһиги тэрилтэбитигэр кэлэр оҕолор талбыт идэлэригэр сүрдээх үчүгэйдик үлэлииллэр, үөрэнэллэр. Кинилэр салҕыы идэлэринэн үлэлииллэригэр туоһу суруктаах буолуохтаахтар ону ылалларыгар бу аккредитация ааһаллар. Бүгүҥҥү күн түмүгүнэн 74 оҕо практическай чааһы туттарда».

Устудьуоннар ииппит-такайбыт, үөрэппит уһуйааччыларыгар махталлара муҥура суох. Куруук өйдүүллэр-өйүүллэр, исписэлиис буолан тахсарбытыгар бигэ тирэх буоллулар диэн сэһэргииллэр.

Мария Шербина, устудьуон: «Үлэһиттэрэ өйдүүллэр, өйүүллэр уонна барыларыгар үчүгэйи баҕарабын».

Аккредитацияны туппут эспиэрдэр Жатай техникумун иитиллээччилэрэ чаҕылхайдар, баһылаабыт идэлэригэр сотору кэминэн маастар буолуохтара диэн бигэ эрэллээхтэр.

Анна Бетюнская, 1 №-дээх Өрөспүүбүлүкэтээҕи балыыһа сиэстэрэтэ, сүрүн эспиэр: «Устудьуоннар быйыл үчүгэйдик кэпсииллэр көрдөрөллөрүгэр. Тутталларын, хамсаналларын көрдөххө чаҕылхайдар бааллар».

Жатайдааҕы техникум сиэстирэлэри эрэ буолбакка уопсайа 9 араас хайысханан исписэлиистэри иитэн таһаарар. Ол курдук сварщик, судостроитель, повар, электроментёр уонна да атын хайысхаларга кэлэр үөрэх дьылыгар саҥа устудьуоннары үөрэх кыһата долгуйа күүтэр.