Саха сиринээҕи ветеринария салаата холбоһуктаах үөрэҕи ыытта
Ветеринарнай сулууспа үлэһиттэрин үөрэҕэ буолбут быһылааны билиһиннэрииттэн саҕаланар. Ол курдук, Дьокуускай куорат Марха дьоҕус оройуонугар биир ынах өлбүт, икки төбө ыалдьыбыт диэн иһитиннэрии киирбит. Тугунан ыалдьыбыттара биллибэт.
Бастатан туран бэтэринээрдэр тиийдэ тиийээт хаһаайыстыбаҕа баар кыыллары иһиллээн көрөллөр, температураларын кээмэйдииллэр, ыалдьыбыт кыыллары арааран туспа хаайаллар. Бу үөрэххэ уопсайа 8 тэрилтэ уонна 19 улуус бэтэринээрдэ кэлэн кыттыыны ыллылар.
Игнатий Колодезников, Ветеринарнай сулууспа Саха сиринээҕи салаатын салайааччыта: «Сүрүн соруктара – тэрээһиҥҥэ бэлэм буолуу. Очаг булан бүөлээиһинэ, боруоба ылааһын, тиэйээһин уонна чинчийии. Уонна тиэхиньикэбит үлэлэрин көрүөхпүт».
Оттон өлбүт сүөһүнү анал пакетка суулаан, ветеринарнай сулууспа үлэһиттэрэ уматар дьаамаҕа илдьэллэр. Манна кинини уматан баран, хлорунан ыһаллар, оччоҕуна араас куһаҕан эттиктэр салгыы тарҕамматтар. Уопсайынан хас биирдии хардыы ахсаны барыны-бары араас эминэн эмтээн, ыраастаан иһэллэр. Бу ыарыы салгыы тарҕамматын туһугар ыытыллар сүрүн тэрээһин.
Алексей Неустроев, Ветеринарнай сулууспа Саха сиринээҕи салаатын ресурснай хааччыйыы киинин профилактика салаатын салайаччыта: «Тымныы туман аппараата уоттан үлэлиир, итии туман аппараатын илдьэ сылдьан үлэлиигин. Тымныы туман сиик курдук түһэр, оттон итии хайаҕаска уонна муоста анныгар киирэр, быдан туһалаах».
Үөрэххэ оннооҕор ГИБДД инспектордара кытары кытыннылар. Ыарыы буолбут сиригэр сылдьыбыт массыынаны хайдах көрөллөрүн, эмтээһиҥҥэ хайдах ыыталларын көрдөрдүлэр.
Ветеринарнай сулууспа үлэһиттэрэ сылга биирдэ хайаан да бу курдук мустан анал үөрэҕи ааһаллар. Араас түгэннэргэ бэлэм буоларга эрчиллэллэр. Итиэннэ материальнай-техническай хааччыллыыларын тургутарга, анал тэриллэри баһылыылларыгар ананар.
Сергей Местников, СӨ бырабыытылыстыбатын бэрэссэдээтэлин солбуйааччы: «Ветеринарнай сулууспа үлэтэ хааччыллыыттан олус тутулуктаах. Ол сыалы ситиһээрибит бу сылтан хааччыйыы үлэтин саҕалаатыбыт. Улуус ветеринарнай сулууспалара быйыл саас Ил Дархантан транспорт күлүүһүн туттулар. Билигн үлэ салгыы барар».
Анал үөрэх түмүгүнэн үлэһиттэр үчүгэй бэлэмнээхтэрин бэлиэтээтилэр, итиэннэ мунньахтаан инники үлэлэрин барылын дьүүллэстилэр. Аны балаҕан ыйыгар дойдубут атын регионнарын кытары холбоһуктаах үөрэҕи, эрчиллиини ыытар сорук турар.