"Летний позитив" бэстибээл саҕаланна

Старт бэрилиннэ. Оҕолор велосипед үрдүгэр олорон түһүннүлэр. Бу үһүс түһүмэҕинэн вело-эстафета ыытыллар. Суолга куттал суох буолуу иниспиэксийэ үлэһиттэрэ кэлэн оҕолорго суол быраабылатын, сатыы киһи суолга туох болҕомтону ууруохтааҕын туһунан кэпсииллэр. Хаһыс да төгүлүн кыттыыны ылар оҕолор тэрээһин туһунан санааларын үллэстэллэр.

15-с сылын ыытыллар "Сайыҥҥы позитив" оҕо уонна ПДН үлэһитин сыһыанын тупсарыыга уонна бөҕөргөтүүгэ улахан тирэх буолла.

Марина Мандарова, Дьокуускайдааҕы оҕо киинин дириэктэрин солбуйааччы: «Сайыҥҥы сынньалаҥҥа хапсыбатах уонна учуокка турар оҕолорго анаан бэстибээл тэрийэбит. Биһиги үлэбит оҕо чөл, эт-хаан өттүнэн сайдыылаах, өйүн-санаатын олоруута үчүгэй буоларын туһугар үлэлиибит-хамныыбыт». 

Сайыҥҥы бириэмэҕэ болуоссакка, уулуссаҕа элбэх киһи ролигынан, велосипедынан уонна билиҥҥи кэмҥэ тарҕаммыт электро самокатынан сылдьар буолла. Олортон суол быраабылатын сөпкө тутуһар киһи ахсааннааҕа билиннэ. Суолу туоруур киһи велосипедыттан, самокатыттан түһэн, сатыы барыахтаах. Бу боростуой быраабыланы улахан да дьон, оҕолор даҕаны кэһэллэрэ киэҥник бэлиэтэнэр.

Владилена Охлопкова, Дьокуускай куорат суолга-иискэ салалтатын сэрэтэр үлэҕэ салаатын иниспиэктэрэ: «Бу сайын куораппытыгар самокат олус элбээтэ. Бу көлө суол быраабылытыгар бэйэтэ туспа пууннаах. Велосипеды кытары тэҥ ирдэбиллээхтэр». 

6 полиция отделыттан уопсайа 36 оҕо кыттыыны ылар. Сорох оҕолор 5-с сылларын бу тэрээһиҥҥэ кытталлар. Кинилэри отделтан салайааччылара илдьэ кэлэн, бүтүн хамаанда тыынын олохтуур.

Виктория Ефимова, Строительнай уокурукка полиция салаатын иниспиэктэрэ: «Сокуоннай саастарын ситэ илик оҕолор иниспиэктэрдэрэ тэрээһин кэмигэр оҕолору кытта билсэллэригэр туһуланар тэрээһин. Велосипед, самокат элбээбит кэмигэр маннык бэстибээли ыытар тоҕоостоох». 

Хаһыылаах-ыһыылаах, тыҥааһыннаах 3-с түһүмэххэ, оҕолор ордук оҥостон кэлбиттэр. Хас биирдиилэригэр төбөнү, тоҕоноҕу уонна тобугу харыстыыр шлем бэрилиннэ. Бу эстафетаҕа оҕо түргэн-тарҕан туттунууттуттан ураты, өссө эбии барытыгар болҕомто ууруллуохтааҕын саныыра ирдэнэр. Бу түһүмэх оскуола оҕолоро хамаандаҕа үлэлиир дьоҕурдарын сайыннарар.

Наталья Григорьева, Дьокуускай куорат 1-кы полиция салаатын аҕа иниспиэктэрэ: «Былырыын кыттыбыт оҕолорбут быйыл эмиэ кытта сылдьаллар. Сөбүлээн кытталлар. Мантан салгыы “Таежный герой” диэн тэрээһин буолуохтаах. Онно хоно сытан күрэхтэһэллэр. Оттон бу буола турар күрэхпит хас да түһүмэхтээх, сарсын квист буолуоҕа». 

Бэстибээл от ыйын устата ыытыллар. Хас түһүмэх аайы бэйэлэрин туйгуннук көрдөрбүт хамаандалар полиция отделын аатыттан анал бириистэри ылыахтара, ол туһугар хамаандалар бириистээх миэстэ уонна муҥутуур кыайыылаах иһин күрэхтэһэ сылдьаллар. Оттон велоэстафета түмүгүнэн суол быраабылатын үчүгэйдик билэр үс хамаанда минньигэс бирииһинэн уонна мэтээлинэн наҕараадаланыахтара.