Тулаайах хаалбыт оҕону иитэ ылар дьиэ кэргэн ахсаана элбиир

Бу саалаҕа  бары амарах дууһалаах,  аһыныгас сүрэхтээх дьон мустан олорор. Тулаайах эбэтэр көрүүтэ-истиитэ суох хаалбыт кырачааннарга ийэни аҕаны солбуйар аналлаах. Оҕону иитэ ылыы курдук  сыралаах дьыаланы ылсыбыт дьону чиэстээһинтэн 8 төгүлүн ыытыллар сүлүөт саҕаланна. Манна биир санаалаах, биир сыаллаах дьон мустан санаа атастаһалларыгар аналлаах тэрээһини туһааннаах түмсүү сыллата тэрийэн ыытар. Инники үс сылга иитэ ылар дьиэ кэргэн ахсаанын хас да төгүл улаатыннарар улахан сорук турар.

Зояна Боронова, оҕону иитэ ылар дьиэ кэргэн түмсүүтүн салайааччы: "Өрөспүүбүлүкэбит Ил дархана 2028 сылга диэри оҕо дьиэтигэр иитиллэр оҕолор ахсааннара аҕыйыахтаах, кинилэр дьиэ кэргэҥҥэ иитиллиэхтээхтэр диэн соругу туруорар. Ол иһин биһиги оҕону иитэр дьону ыҥырабыт".

Үгүс чинчийии, кэтээн көрүү көрдөрүнэн дьиэ кэргэҥҥэ улааппыт оҕо олоххо быдан бэлэмнээх буолар. Онон оҕо дьиэтин иитиллээччитин ахсаанын аччатар сыалтан иитэр дьиэ кэргэттэргэ көрүллэр төлөбүр кээмэйэ ааспыт сылга биллэ улааппыта.  Күн бүгүн  Саха сиригэр оҕону иитэ ылбыт 235 ыал баар. Кинилэргэ барыта 656 кырачаан сылаас сыһыаҥҥа улаатар. Бу көрдөрүү сыллата тупсар. Мэҥэ Хаҥаластан сылдьар Поповтар ааспыт сылтан саҕалаан түөрт оҕоҕо ийэлии, аҕалыы сыһыаны бэлэхтииллэр.

Мария, Николай Поповтар, оҕону иитэр дьиэ кэргэн: "Биһиги бу сүлүөккэ эмиэ биһиги курдук оҕо иитэр ыалы кытта ыкса билсээри-көрсөөрү, элбэх саҥаны билээри кэллибит. Бастаан ыарахан курдук буолуон сөп. Онтон аа-дьуо оҕолору кытта тэҥҥэ биир буолаҕын, төрөппүт оҕолруҥ курдук буолаллар".

Сүлүөккэ холобур буолар улуустары бэлиэтээтилэр. Ньурба улууһа олох ыараханыгар түбэһэн ийэтэ аҕата суох хаалбыт оҕолору иитэр ыалга бэйэтэ туһунан төлөбүрдэри көрөр. Ол курдук хас биир оҕо аайы сүүстүү тыһыынча солкуобай уонна дьиэ өрөмүөнүгэр көмө тыырыллар. Маны сэргэ улуус бэйэтэ олохтообут түөскэ анньыллар бэлиэ туттарыллар. Анна Иннокьентева улуус үтүө холобурун мустубут дьону кытта үллэһиннэ, саҥа этиилэри киллэрдэ.

Анна Иннокентьева, оҕону иитэр дьиэ кэргэн ийэтэ: "Куруутун элбэх оҕолоох дьиэ кэргэттэр ахсааннарыгар биһигини киллэрэллэрин туруорсабыт. Оччоҕо туох баар туруорсар туруорсууларбыт онно киирэн хаалыа эбиттэрэ буолуо. 11 оҕону ииттим да 2 оҕолоох курдукпут".

Сүлүөт кыттыылаахтарын кытта оҕо иитиитигэр быһаччы ситимнээх исписэлиистэр үлэлэстилэр. Ханнык да үчүгэй үлэлээх оҕо дьиэтэ дьиэ кэргэн сылаас сыһыанын солбуйбатын, онон сүрүн соругу толорууга бары түмсэн үлэ барыахтааҕын ыйдылар.