Саха киинэтэ үрдүк чыпчаалга
Үрдүк ситиһии, бастыҥ наҕараада. Режиссер Алексей Романов "Хаар куйаар номохторо" киинэтэ Бишкек куоракка ыытыллыбыт аан дойдутааҕы киинэ бэстибээлигэр Гран-при үрдүкү наҕарааданы ылан, кыайыы көтөллөөх, үөрүү өрөгөйдөөх дойдуларыгар төҥнөн ситиһиилэрин үллэстэллэр.
Алексей Романов - киинэ режиссёра: «Элбэх дойдуттан кыттааччылар бааллар. БиҺиги дьолбутугар киинэбитин сүрдээҕин бары өттүттэн сыаналаатылар».
Итэҕэл, таҥнарыы, таптал барыта бу киинэҕэ ойууланан көрөөччү дууһатын кылын таарыйар гына оҥоһуллан, философскай хабааннаах уус-уран киинэ чочуллан тахсан сотору кэминэн көрөөччү киэҥ араҥатыгар тахсыаҕа. 1986 сыллаахха режиссер Алексей Романов дипломнай үлэтигэр Николай Заболоцкай - Чысхаан "Мааппа" айымньытынан устубут тэттик киинэтин салгыытынан ааҕыахха сөп. Ол эрэн, манна атын история, кэрчик ойууланан бастакы киинэттэн чынха атын. Дьылҕа хаан, эр киһи, дьиҥ таптал көстүүтэ күүскэ бэрилиннэ. Киинэҕэ сүрүн миэстэни Хаар ылар.
Алекей Егоров - "Сахафильм" тэрилтэ салайааччыта, продюсер: «Хаары омук дьоно бэлиэтии көрөр. Алексей Семенович этэринэн элбэх киһи кэлэн интириэһиргиир үһү. Биир режиссер Саха сиригэр хаары уһуларга үөрэммиккит диэн хайҕабыл тылларын эппит. Кинилэр уһулааччылара хаары уһулалларыгар ыарырҕаталлар үһү. Уонна улахан экраҥҥа олус дьиктитик көстөр».
Киинэни ааспыт сыл кулун тутар, муус устар ыйдарыгар устубуттар. Айар бөлөх биир сыл устата пост продакшн үлэтин ыытан, аны билигин киинэ бэстибээллэригэр кыттар. Продюсер Сардана Саввина өҥөтүнэн, киинэ өссө аны күһүҥҥэ диэри 7 бэстибээлгэ сылдьара күүтүллэр. Билигин да араас таһымнаах тэрээһиннэргэ ыҥырыылары тута тураллар. Режиссер өр сыллаах ырата туолан үөрүүтэ үгүс.
Алекей Егоров - "Сахафильм" тэрилтэ салайааччыта, продюсер: «Толору миэтиргэ устар баҕалаах этим бу айымньыннан. 30 сыл буолан баран ситистим. Салгыытын курдук атын көрүүлээх-истиилээх оҥордубут».
Киинэ көрөөччү дьүүлүгэр алтынньы ыйыгар тахсара күүтүллэр. Саха сиригэр эрэ буолбакка, бүтүн дойду үрдүнэн көстүөҕэ. Сатаннаҕына ону ааһан тас дойдуларга көстөрө күүтүллэр.