Саха сиригэр эрдиилээх уу аалларынан күрэх аан бастакытын ыытылынна

Старт бэриллэн күрэх саҕаланар. Эрдиинэн уһуллар суудуна кыттааччылара күрэххэ түһүннүлэр. Хатас боротуокатыгар аан маҥнайгытын кыра кээмэйдээх суудунанан, эрдиинэн усттааччылар бастакы чемпионаттара Өлүөнэ эбэнэн түүҥҥү устуулара саҕаланар.

Бу тэрээһини аан бастакытын Өрөспүүбүлүкэҕэ спортивнай туризм бэдэрээссийэтэ тэрийэн ыытта. Бүгүн чуолаан эрдиинэн устар уу ааллахтара түмүстүлэр. Төһө да күүстээх ардах, хахсаат тыал турдар, бастакы чемпионакка уопсайа 68 кыттаччы кыттарга нүөмэрдэрин ыллылар. Ариан Тарасов уонна Леонид Зырянов икки миэстэлээх суудунанан кыттарга, аалларын бэрийэллэр. Бэлэмнэмиппит, билигин устууну траасса көрдөрүө диэн спортсменнар санааларын үллэстэллэр.

Ариан Тарасов, күрэх кыттааччыта: «Каркаснай байдарканан устаары сылдьабыт. Икки буолан табаарыспын кытта устабыт. Син бэлэмнэмиппит. 15 км барабыт».

Манна бэйэлэрэ тус туризмынан дьарыктанар дьон уонна бүтүн тэрилтэлэр кыттыыны ыла кэлбиттэр. 2016 сыллаахтан тэриллэн үлэлиир туристическай хампаанньа салайааччыта Федор Винокуров кэллэктиибин барытын соһон аҕалан кыайыыга эрэллээх.

Фёдор Винокуров, күрэх кыттааччыта: «Бу “Ямал 470” диэн катамаран, 6 киһилээх, 25 кг ыйааһына. Устуубут улахан ыарахана суох. Манна сүрүнэ тэтими тутуһуохха наада».

Биллэн туран, Өлүөнэ эбэҕэ буолар тэрээһини ыксаллаах быһыы-майгы министиэристибэтин уонна Дьокуускай куорат быыһыыр сулууспата суох ааспат. Быыһааччылар ууттан, анал катердарынан кыттааччылары кэтии сырыттылар. Көмө наада буоллаҕына тохтоон, көмөлөһөн, ууга саҕаланыаҕыттан, бүтүөҕэр диэри сырыттылар.

Чахчы бастаан ардаан, тыалыран баран, күн-дьыл мэлдьэспиттии, тупсан хаалла. Онон кыттааччылар бойобуойдуу турунан, тохтообокко уһуннулар. Тыҥааһыннаах киирсии түмүгүнэн саамай бастакынан Ариан Тарасов уонна Леонид Зырянов хамаандата 203 мкрн кытылын буллулар.

Леонид Зырянов, күрэх кыайыылааҕа: «Үчүгэйдик уһуннубут, кыра дьарыктаах буолан быстыбатыбыт. Бастакы устар буоламмыт финишпыт ханна баарын үчүгэйдик билбэт этибит. Наар ол туолкуйа этэ».

Эрдээччиллэр бастакы бырааһынньыктара үрдүк таһымнаахтык ааста. Оттон бу күрэх үгэскэ кубулуйан, сыллата ыыттыллар буолуоҕа.