Дьокуускай куорат дьон хаамар сирдэригэр өрөмүөн үлэтэ салҕанар

Сайыҥҥы кураан былдьаһыктаах күннэргэ суол үлэһиттэрин үлэлэрэ тэтимирэр. Куурбут кумаҕы күннэтэ таһан, балаһааккаларын тэҥнээн, суол бүрүһүөнүн тэлгииллэр. Каландаришвили - Ойуунускай уулуссалар харсыһыыларыгар турар устудьуоннар тутуу этэрээттэрин скверыгар үлэ күөстүү оргуйар. Манна 10-тан тахса киһи күннэтэ үлэлиир.

Октябрьскай уокурукка уопсайа 2000-тан тахса квадратнай миэтэрэ иэннээх тротуар саҥардыллан оҥоһуллар. Итиэннэ массыына тохтуур сирдэригэр, элбэх кыбартыыралаах дьиэлэр тэлгэһэлэрин учаастактарын өрөмүөннүүллэр. Күөрэ-лаҥкы барбыт сир барыта кэриэтэ дэхсилэнэн, дьон хаамарыгар табыгастаах усулуобуйа олохтонуохтаах.

Валентин Эверстов, Октябрьскай уокурук салайааччыта: “Октябрьскай – Орджоникидзе учаастак. Манна эргэ тротуары уларытыыта буола турар. Сирин тэҥнииллэр, урут манна уу мустар этэ”.

Эргэрбит, алдьаммыт плитканы барытын туһаҕа таһааран иһэллэр. Куорат атын учаастагар баар суоллары өрөмүөннээһиҥҥэ тутталлар. Онтон үлтүрүйбүт, алдьаммыт чааһын эмиэ туһаҕа ыытан, улахан дьаамалары бүөлээһиҥҥэ, толорооһуҥҥа ыыталлар.

Онтон бетонунан, аспаалынан дэхсилэммит сирдэри өрөмүөннээһиҥҥэ атын ньыма туттуллар. Манна алдьаммыт учаастагы ыраастаан, үлтүрүтэн оҥороллор.

Дьон хаамар сирэ сыгынньахтанан аҥардас кумаҕынан эрэ көрөн сытар сирэ элбэх. Өрөмүөн үлэтин кэмигэр тыаллаах күҥҥэ кумах ыһыллан, көтөн нэһилиэнньэҕэ элбэх мэһэйи үөскэтэр.

Валентин Эверстов, Октябрьскай уокурук салайааччыта: “Бэдэрээтчит киэһээ айы тахсан быыл ыраастыыр. Тиэхиникэнэн уонна илииннэн хомуйаллар”.

Кумаҕы кытары тэҥҥэ араас аллергияны үөскэтэр эттиктэр баар буолуохтарын сөп. Онон оттон-мастан эрэ буолбакка уулусса быылын кытары киирэн балаһыанньаны өссө уустугурдар. Бу маннык түгэҥҥэ анал таҥастаах, муннугутун ыраастана сылдьаргыт ордук диэн быраастар сүбэлииллэр.

Наталья Ким, М. Е. Николаев аатынан Өрөспүүбүлүкэтээҕи мэдиссиинэ киинин аллерголог бырааһа: “Суол кумаҕа киһиэхэ улахан куттала суох. Аллергия ыҥырар кумахтааҕар атын”.

Плиткалары уларытыы Дьокуускай куорат үрдүнэн бэс ыйын 15 күнүгэр диэри буолуоҕа. Онтон тротуардары оҥоруу бастакы түһүмэҕэ бу ый бүтүөр диэри ыытыллыаҕа.