Ойуурга баһаар тахсыбатын сэрэтэр рейдэлэр буолаллар
Бу күннэргэ Дьокуускайга ойуурга баһаар тахсыбатын сэрэтэр ыксаллаах быһыы-майгы иснпиэктэрдэрэ, быыһааччылар уонна полиция холбоһуктаах рейдэлэр буолаллар. Айылҕаҕа тахсан сынньанар, уот оттон шашлыыктыыр дьоҥҥо баһаар түгэнигэр төлөпүөн нүөмэрин санаталлар, уот турбут түгэнигэр тугу гыныахтаахтарын өйдөтөллөр уонна уот отторго ирдэнэр сүрүн быраабылалары кэпсииллэр.
Аян Харабаев, ЫБММ Саха сиринээҕи салалтатын кэтиир уонна сэрэтэр үлэҕэ Дьокуускайдааҕы салаатын иниспиэктэрэ, ис сулууспа лейтенаана: «Бастакы быраабыла – аһаҕас уоту туттуо суохтарын наада. Холобур ас астыыр буоллахха аһаҕас уота суох, чох туттуохха сөп. Уот тарҕамматын курдук сири тула хаһыахха наада. Уонна ол аттыгар уу баар буолуохтаах».
Покровскайдыыр суол кытыытынан Владимировка аттыгар буспут эт минньигэс сыта муннуга саба биэрэр. Өрөбүллэри баттаһан Андрей Васильев доҕотторун кытары сынньана тахсыбыт. Уоттан сэрэхтээх буолартан таһынан, сынньана кэлбит дьон бэйэтин кэннэ бөҕү-саҕы хомуна сылдьыахтаах диэн санаатын үллэһиннэ. Бу курдук сэрэтэр, өйдөтөр рейдэлэр ситимнэрин быспакка ыыттылла тураллара бэрт туһалаах диэн бигэргэттэ.
Андрей Васильев, Дьокуускай олохтооҕо: «Бу доҕотторбутун кытта халлаан сылыйан айылҕаҕа таҕыстыбыт. Кэлэммит сирбитин уоппутун ыраастаатыбыт. Дьон бастатан туран бэйэтин ыраастык, уокка сэрэхтээхтик сыһыанын тутуһа сылдьыахтаах дии саныыбын».
Полиция үлэһиттэрэ этэллэринэн шашлыктыы тахсыбыт дьон өттүлэриттэн аһыы утаҕы сиэрэ суох иһии, охсууһуу, айдаарсыы уонна да атын сокуону кэһии түбэлтэлэрэ суохтарын кэриэтэ.
Айсен Самсонов, ИДьМ Саха сиринээҕи салалтатын суолга айан сырыытын кэтиир сулууспатын тустаах батальонун полицейскайа: «Биһиги бэрээдэги кэспэттэрин кэтиибит, дьоннору сэрэтэбит, сиһилии кэпсиибит ыстырааптары, ыстатыйалары. Дьон син истэр. Айылҕаҕа үксүн дьиэ кэргэннэр тахсаллар, өйдүүллэр».
Дьокуускай эркин аһаҕас халлаан анныгар мангал иһигэр уот оттон ас астыахха сөптөөх 4 сир баар. Анал быраабылалары тутустахха бу ыйыллыбыт сирдэргэ хаһан баҕар, түүннэри-күнүстэри сылдьар бобуллубат.
Аян Харабаев, ЫБММ Саха сиринээҕи салалтатын кэтиир уонна сэрэтэр үлэҕэ Дьокуускайдааҕы салаатын иниспиэктэрэ, ис сулууспа лейтенаана: «Сынньанарга көҥүллээх сирдэр – Хаҥалас оройуонугар Өлүөнэ өрүс кытыла, Покровскайдыыр суол 25 км-гэ Синньигэс күөл хаҥас биэрэгэ, Нам трактын 22 км суолтан хаҥас өттүгэр. Куорат олохтоохторо баһаартан сэрэхтээх буоларгытыгар, ол түгэҥҥэ 101 ол эбэтэр 112 нүөмэргэ эрийэн биллэрэҕит».
Санатан этэр буоллаххына, 2023 сылга Саха сирин үрдүнэн уопсайа мөлүйүөнтэн тахса гектар иэннээх ойуур баһаарга былдьаммыта. Онон суостаах уот тарҕамматын туһугар ыксаллаах быһыы-майгы иснпиэктэрдэрэ олус боростуой ол эрэн көдьүүстээх быраабылалар тутуһуллалларын ирдииллэр.