Саха сирин өрүстэрэ быйыл эрдэ эһиннилэр

Өлүөнэ өрүс төрдүгэр көмүөл мууһа устан саҕалаата. Иркутскай уобалас Алымовка сэлиэнньэтигэр ыам ыйын 1 күнүттэн муус тэтимнээхтик уста сытар. Онтон Саха сирин кыраныыссатыгар 1-2 хонугунан кэлэрэ сабаҕаланар.

Билигин муус сууккаҕа 131 килиэмиэтир кэриҥэ ырааҕы ааһар. Ол аата Ленскэй улууһун Витим бөһүөлэгигэр ыам ыйын 3-4 күннэригэр кэлиэхтээх, онтон Ленскэй куоракка ыам ыйын 6-8 күннэригэр, Өлүөхүмэ улууһугар 10-11 күннэригэр, Покровскай-Дьокуускай-Кангалаас эҥэр ыам ыйын 18-19 күннэригэр, Сангаарга 18-19 күнүгэр, онтон Күһүүр диэки ыам ыйын бүтэһик күннэригэр тиийэрэ сабаҕаланар.

Петр Аргунов, Өлүөнэ өрүс тардыытын ууга салалтатын салайааччы: «Ыксаллаах быһыы-майгы министиэристибэтин иһинэн суһал бөлөхтөр үлэлэрэ номнуо саҕаланна. Ол курдук бастакы бөлөх Ленскэй оройуонугар көттө. Ону таһынан сотору кэминэн өссө 3 бөлөх Алдаҥҥа, Халыма улуустарыгар үлэлии барыахтара».

Амма өрүскэ көмүөл мууһун хамсааһына бэлиэтэннэ. Улуус үрдүнэн уопсайа 6 нэһилиэк ууга барар кутталлаах. 4 нэһилиэк Амма өрүс төрдүгэр, 2 нэһилиэк Суола үрэх төрдүгэр тураллар. Онон халаан уутугар бэлэмнэнии үлэлэрэ хас да бүк сытыырхайан тураллар.

Василий Бураев, Амма улууһун баһылыгын солбуйааччы: «Бэлэмнэнии үлэтин чэрчитинэн быстах кэмҥэ дьону олордор пууннары бэлэмнээтибит. Сылгы, ынах сүөһүнү куоттарар үрдүк сирдэри оҥордубут. Маны сэргэ 12 ыксаллаах быһыы-майгы муниципальнай биригээдэлэрин бэлэмнээтибит. Ирдэнэр аһы-үөлү барытын ылан олоробут».

Сахабыт сирин өрүстэрэ, үрэхтэрэ эстэллэрэ олох кыра кэм хаалла. Билиҥҥи туругунан бүтэһиктээх бэлэмнэнии, мууһу кэбирэтии үлэлэрэ барыта түмүктэнэн тураллар.