Улуу айанньыт суолунан
Дьокуускай Охотскай хайысханан сырыы айан ааспыт үйэ саҥатыгар тохтообута. Онтон хас эмэ уонунан сыллар кэннэ 12 киһилээх экспедиция омоон суоллар устун айаҥҥа турунна. Көстөрүн курдук суол-иис суох, туһаайыы эрэ. Үгүс сирдэри үрэхтэр быһа сүүрбүттэр. Онон уустук айан, ол эрэн улахан суолталаах, соруктаах.
Георгий Никонов, "Улуу сырыылар суолларынан" бырайыак ааптара, Ил Дархан сүбэһитэ: "Сыалбыт-сорукпут диэн бу суол туруга хайдаҕый, салгыы туһаныахха сөп дуо диэн. Иккиһинэн, историческай суолтатын үөрэтии буолла, урукку сырыылар бэлиэлэрэ бааллар. Итиэннэ, үсүһүнэн, Охотскайга диэри суолу туризм хайысхатыгар туһаныахха сөп дуо диэн үөрэтии".
Былаан быһыытынан айанньыттар 4 күнүнэн Охотскайга тиийиэхтээх этилэр, ол эрэн сылдьыллыбатаҕа ырааппыт суол үгүс ымпыктаак-чымпыктаах буолла. Ол иһин 1200 эрэ килэмиэтири сэттэ суукканы быһа айаннаабыттар. "Улуу сырыылар суолларынан" бырайыак чэрчитинэн Витус Беринг туһунан документальнай киинэ уһуллуута экспедиция кэмигэр саҕаланна. Эһиил кини бу Дьокуускай Охотскай трагын арыйбыта 300 сыла буолар. Онон история биир суолталаах кэрчик кэмин үйэтитии экспедиция биир сүрүн соруга.
Афанасий Владимиров, Витус Беринг суолунан айан кыттыылааҕа, норуот депутата: "Витус Беринг туһунан документальнай киинэ устуохтаахпыт. Кини Дьокуускай куоракка 3,5 сыл олорбута, Охотскай трагынан иккитэ айаннаан турардаах. Суолбут-ииспит ыарахан этэ. Уус Майаттан Аллаах Үүҥҥэ диэр суол баар буоллаҕына, онтон ыла Аарка диэн бөһүөлэккэ диэри суол олох суох. Билигин биһиги ити суолунан баран кэллибит уонна кыһыҥҥы суол оҥоруохха сөп эбит диэн быһаардыбыт".
Суруналыыс, фотограф Утум Захаров "суол бэлиэтээһиннэрин" оҥордо. Бу Чолбон сурунаал кэлэр нүөмэригэр дьон-сэргэ ааҕыытыгар тахсыаҕа. Манна экспедиция мүччүргэннэх сырыыларыттан саҕалаан, олохтоох табаһыттар олохторо-дьаһахтара, Охотскай дьонун-сэргэтин кытта көрсүһүү түгэннэрэ, суол туруга сырдатыллыа.
Утум Захаров, Витус Беринг суолунан айан кыттыылааҕа, суруналыыс: "Олохтоох омуктар эбээннэр биһигини олус истиҥник көрүстүлэр. Онтон Охотскайга тиийбиппитигэр махтаналлар биһигин умнубакка кэлбиккитигэр диэн, сорохтор сатаан кэлиэ суохтара диэбиппит кэллигит диэн".
Экспедиция кэмигэр уһуллан саҕаламмыт документальнай киинэ салгыы "Моя планета" телеканалы кытта устууну ыытыаҕа. Итиэннэ үбүлүөйдээх сылга киинэ сүрэхтэниэ. Онтон экспедиция түмүгүнэн Охотскай трагы сөргүтүүнү быһаарыахтара.