Чурапчы улууһун кээпэрэтиибэ бэйэ аһынан хааччыйар

СХПК Чурапчы уопсайа 20 нэһилиэктэн үүт тутар. Күннээҕи нуормалара билигин 4,7 туонна тахсан турар. Бу кээпэрэтиип төрүттэниэҕиттэн үүт туттарар бааһынай хаһаайыстыбанан комплекс буолар. Чурапчы биир бөдөҥ хаһаайыстыбата сылга 330 туонна үүтү ыыр эбит буоллаҕына, быйыл ити сыыппаралары элбэтэр былааннаахтар.

Иван Парфенов, "Комплекс" бааһынай хаһаайыстыба салайааччыта: «Кыһынын үстэ аҕалабыт. Сайынын күн аайы 1,5 туонна сайылыкпыттан киллэрэбит. Сылга 250 туоннаны туттарабыт. Быйыл күүскэ үлэлээн 300 туонна туттарар былааннаахпыт».

Кэлбит үүтү бастаан лабораторияҕа бэрэбиэркэлииллэр. Валерия диэн эдэр лаборант, үүт сыатын таһаарар. Нуорматын таһааран баран, үүтү резервуарга ыыталлар. Маннык идэ улахан болҕомтону эрэйэр диэн эдэр испэсэлиис этэр.

Валерия Мишкина, Чурапчытааҕы бэйэ аһын оҥорон таһаарар кээпэрэтиип лаборана: «Сернай кислотаны сэрэнэн туттуохха наада, ынырык күүскэ реакциялыыр. Сыата тахсарын курдук сернай кислота эбэн биэрэбит».

Бастыҥ хаачыстыбалаах аһы оҥорон таһаарар кээпэрэтиип сүрүн кистэлэҥэ эт аһыгар биир да соя эппэтэ буолар. Атыылаһааччылар ону олус биһирииллэр. Оттон үрүҥ ас көрүҥүттэн көрөн баара суоҕа 7-тэн 14 күҥҥэ эрэ диэри хараллыан сөп - бу сибиэһэй бэйэ аһа буоларын дакаастыыр.

Виктория Лазарева, Чурапчытааҕы бэйэ аһын оҥорон таһаарар кээпэрэтиип технолога: «Сайынын иэдьэгэй оҥорбоппут. Үксүн арыы уонна бэйэтинэн. Быырпах ыһыах саҕана эбиллэр».

Уопсайа кээпэрэтиип 143 үлэһиттээх. Үксүн тыа хаһаайыстыбатын бүтэрбит үрдүк үөрэхтээхтэр. Аан дойду уонна дойду таһымнаах күрэхтэргэ, быыстапкаларга бастыҥ көрдөрүүлэри сурунар. Тыа хаһаайыстыбатын министиэристибэтин көмөтүнэн, сылын аайы араас бырагыраамаларага кыттан ас оҥорор тэриллэрин саҥардаллар.

Айталина Павлова, Чурапчытааҕы бэйэ аһын оҥорон таһаарар кээпэрэтиип салайааччыта: «Оҥорон таһаарар ассортимеммыт 37. Дьыл кэминэн көрөн эбиллэр. Сүрүн астарбытын Чурапчы арыы собуота оҥорор. Халбаһы собуотугар ыыһаммыт эт сотору тахсыаҕа».

Сыл аайы ас көрүҥүн элбэтэн иһэллэр. Сүрүн эргинэн олороллоро биллэн турар үрүҥ ас, ол эрээри эт ас эргиниитин эмиэ тэҥниир баҕа санаалаахтар. Эт бородууксуйатыгар бренд буолбут халбаһыта, фрикаделька, кэтилиэт. Уонна бу соторутааҕыта бэлимиэн оҥорор аппараат ылбыттара. Ол аппараат 1 чаас иһигэр 300 киилэ бэлимиэни оҥорор таһаарар кыахтаах. Онон Чурапчы бэйэ аһын оҥорон таһараар кээпэрэтиибэ аһын көрүҥүн дэлэтэр.