Эдэр спортсменнарга үчүгэй усулуобуйа тэрийиллэр

Киирээти кытары миинньигэс ас сыта саба биэрэр. Ньурба Антоновкатыгар биир саҥа эбийиэк - боксердар  остолобуойдара үлэҕэ киирдэ. Аныгы ирдэбилгэ толору эппиэтиир эбийиэк 60-тан тахса эдэр спортсменнары  уонна үлэһиттэри аһатар буолуоҕа

Валерий Пахомов, А.И.Пахомов аатынан буоксаҕа Олимпийскай эрэллэр спортивнай оскуолатын хаһаайыстыбыннай салаатын салайааччыта: «Спорт министиэристибэтэ уонна Ньурба улууһа сүбэлэспиттэрин кэннэ бу саҥа остолобуой тутуута саҕаламмыта. 2023 сылга үлэҕэ киирбитэ уонна үлэтин саҕалаары бэлэм турар. Туох баар ирдэбилгэ барытыгар эппиэттиир. Эргэ остолобуойбут 1955 сыллаахха тутуллубут этэ».

Биллэн туран хайа баҕарар спортсмен үтүө түмүктэрэ хайдах аһыырыттан-сиириттэн үгүс тутулуктаах. Онон манна аска-үөлгэ улахан болҕомтону уураллар. Эдэр боксердар бары манна Антоновкаҕа интернат дьиэҕэ олорон эрэ үөрэнэллэр, дьарыкатаналлар. Онон  дьиэлэриттэн тэйиччи олорор оҕолорго үчүгэй усулуобуйа тэрийиллэр. Интернат үлэһиттэрэ онно төһүү буолаллар.

Тимур Пахомов, А.И.Пахомов аатынан буоксаҕа Олимпийскай эрэллэр спортивнай оскуолатын алын иитээччитэ: «2013 сыллаахха аһыллыбыта. 11 сыл иһигэр үгүс элбэх оҕолору иитэн таһаардыбыт. Оҕолорбут Дьокуускайга Олимпийскай резерв үөрэҕэр өссө күүскэ дьарыктаналлар. Билигин 24 оҕолоохпут, үчүгэйдик үөрэнэллэр, 3 баспытаатал баар».

Оскуола арыллыаҕыттан үтүө суобастаахтык, бэриниилээхтик үлэлии сылдьар Тимур Иннокентьевич, Артур Иннокентьевич Пахомов хаан уруу быраата буолар. Онон бу хайысхаҕа үлэ ылы-чып барар. Оҕолор сарсыардаттан киэһээҥҥи диэри кинилэр эппиэтинэстэригэр сылдьаллар. Оттон сөптөөх көрүүгэ-харайыыга сылдьар оҕолор биллэн туран,  үчүгэй түмүктэрдээхтэр.

Ефрем Лампаров, А.И.Пахомов аатынан буоксаҕа Олимпийскай эрэллэр спортивнай оскуолатын иитиллээччитэ: «Өрөспүүбүлүкэ күрэҕэр бастаабытым, 4 киирсии буолбута. Сарсыарда 6:45 турабыт уонна киэһээ 21:30 утуйабыт».

Антоновка буокса түөлбэтэ диэни истэн, оннооҕор ыраах улуустартан кэлэн оҕолор үөрэнэллэр. Холобура, Хоту дойду хоһуун уола, Уссуйаана Хаһааччыйатыттан сылдьар Дамир Юдин туохтан да толлубакка манна үөрэнэ кэлбит. 

Бу курдук иитиллээччилэригэр сөптөөх усулуобуйаны тэрийэн, Антоновкатааҕы буокса оскуолата таһаарыылаахтык, үтүө холобур буолан үлэлиир.