Антоновкаҕа чулуу тренер Артур Пахомов аатын үйэтитэргэ үгүс үлэ барар
Дьарык ураты тыына сааланы сабардыыр. Бириэмэ 4 чаас. Оччоҕо уолаттар миэстэлэригэр ох курдук оҥостон, тренер тугу хамаандалыырын толороллор. Өрөспүүбүлүкэҕэ эрэ буолбакка, бүтүн Дойду үрдүнэн аатырыбыт спортсменнардаах, бокс көрүҥэр чаҕылхай көрдөрүлээх Антоновка боксатын оскуолатыгар дьарыктар бу курдук барыллаах ааһаллар.
Тренер, боксаҕа Арассыыйа спордун маастара, эмиэ Артур Иннокентьевич биир иитиллээччитэ Михаил Хатылыков болҕомтолоох көрүүтүнэн дьарыктар ааһаллар. Билигин кини 3 бөлөҕүнэн арааран, уопсайа 30 боксуору дьарыктыыр. Бу бэрт соторутааҕыта тустаах оскуола үөрэнээччилэрэ тиийэн Өрөспүүбүлүкэҕэ бастаан, билигин Уһук Илин регион күрэҕэр барарга сыалланналлар.
Михаил Хатылыков, тренер, буоксаҕа Россия спордун маастара: «Өрөспүүбүлүкэтээҕи күрэххэ 1 иитиллээччибит чемпион аатын ылбыттара. Ол таһынан 5 оҕобут үрүҥ көмүс уонна 2 оҕобут боруонса мэтээллээх дойдутугар кэлбитэ. Уопсайа 17 оҕону күрэхтэһиигэ илдьэ барбыппыт, онтон 9 оҕо мэдэллээх кэлбитэ. Аны Уһук Илин кыра оҕолор күрэхтэригэр 4 миэстэлэспит уолу кыттарга бэлэмнэниэхтээхпит».
Артур Пахомов аатын сүгэр саалаттан кынаттанан барбыт уолаттар, манна син биир кэлэн күүстээх дьарыктарын ааһаллар. Роман Дмитриев аатын сүгэр олимпийскай эрэллэр училищетын устудьуона Александр Иванов терөөбүт түөлбэтигэр, үүнэн-сайдан тахсыбыт оскуолатыгар тиритэ-хорута эрчиллэр. Билигин кини тренер Андрей Слепцовка дьарыктанар. Бокса көрүҥэр сана эдэр эрэл.
Александр Иванов, Р.М.Дмитриев аатынан Олимпийскай эрэллэр училищетын 2 кууруһун устудьуона: «Өрөспүүбүлүкэҕэ 3-тэ маҥнайгы миэстэни ылан турардаахпын. Уһук Илин 3-тэ күрэхтэспитим: бастакыбын 2021 сыллаахха 2-с миэстэ буолбутум, онтон 2022 сыллаахха 3-с миэстэни ылбытым уонна 2023 сыллаахха Владивосток куоракка буолбут Уһук Илин первенстовтыгар бастакы миэстэни ылары ситиспитим».
Артур Иннокентьевич аатын үйэтитэргэ манна үгүс үлэ барар. 2021 сылаахха улуу тренергэ анаммыт мэҥэ таас турбута. Билигин үлэһиттэр өссө киниэхэ анаан манна миэстэтигэр түмэл арыйарга үлэлэһэллэр. Холобура, биир сэдэх экспонат, Артур Пахомов тус кабинката манна аҕалыллыбыт.
Валерий Пахомов, СӨ буоксаҕа оскуолатын Ньурбатааҕы филиалын салайааччыта: «Артур Иннокентьевич аатын үйэтитэр сыаллаах экспонаттары хомуйа сылдьабыт. Холобур, кини эрчийэргэ туттубут лапалара уонна бэйэтин тус кабинката манна кини аатынан ааттаммыт залга аҕалыллан тураллар».
Бу курдук Ньурбалар биир тумус туттар киһилэрэ, чулуу тренер Артур Пахомов аатын үйэтитэргэ үгүс үлэ барар. Быйылгы 2024 сыл кини үбүлүөйүн чэрчитинэн, сылы быһа араас тэрээһиннэр ыытылла туруохтара.