Саха тылын уонна литературатын учууталларын күрэҕэ
Төрөөбүт тыл уонна литература бастыҥ учуутала өрөспүбүлүкэтээҕи күрэх үс күн устата үөрэҕи сайыннарар уонна идэни үрдэтэр институт дьиэтигэр ыытылынна. Быйылгы куонкурска Дьокуускайтан уонна 12 улуустан барыта 13 cаха тылын уонна литературатын учуутала кытынна. Хас биирдии кыттааччы бэйэтин үөрүйэҕин, сатабылын, уһуйар, үөрэтэр дьоҕурун сорудахтарынан көрдөрдө.
Галина Никифорова, күрэх кыттыылааҕа, Мэҥэ Хаҥалас улууһа: «Учуутал үлэтэ уруогунан көстөр. Уруок ыыттыбыт, кылаас-чаас ыыттыбыт уонна бу бүгүн маастар-кылааска кэлэн турабыт. Күрэххэ кытынныбыт».
Бу күрэх түмүктүүр түһүмэҕэ. Кэтэхтэн ыытыллар түһүмэххэ учууталлар бэйэлэрин билиһиннэриилэрин номнуо эрдэ ыыппыттара. Кыттааччылартан саамай уопуттаахтара ыраах Кэбээйи улууһуттан кэлэ сылдьар Антонина Терехова буолар. Антонина Петровна бүтүн 41 сылын Кэбээйи орто оскуолатыгар ийэ тылын уонна литературатын учууталынан айымньылаахтык үлэлии сылдьар.
Антонина Терехова, күрэх кыттыылааҕа, Кэбээйи улууһа: «Бииргэ үлэлиир дьоннорум үксэ бары эдэрдэр. Олору кытта алтаһан сүрдээҕин үөрдүм, элбэҕи ыллым уонна барыларыгар ситиһиини баҕарабын».
Куонкурус кыттыылаахтара бастаан үөрэх араас былаһааккаларынан Методическай мастарскыай, уруок, кылаас чааһа түһүмэхтэригэр холоннулар, салгыы 13 киһиттэн 5 бастыҥ көрдөрүүлээх учуутал түмүк чааска Маастар кылаас күрэҕигэр кытынна. Манна кинилэр бэйэлэрин уруоктарыгар, үөрэтиигэ ханнык-туох сонун ньыманы туһаналларын экспердэр иннилэригэр көрдөрөллөр.
Февронья Ядрихинская, СӨ үөрэҕи сайыннарар уонна идэни үрдэтэр институт үөрэх чааһыгар сэбиэдиссэйэ: «Ол 5 киһи маастар-кылаас көрдөрбүтүн кэннэ бүгүн кыайыылаах быһаарыллыа. Муҥутуур кыайыылаах биллибитин кэнниттэн кини СӨ чиэһин көмүскүү күһүн балаҕан ыйыгар Татарстан Казань куоратыгар барыаҕа»
Ити курдук бүтүн үс күннээх күрэхтэһии кэннэ бары түһүмэхтэргэ үрдүкү баалы, сыанабылы Нам улууһун Нам нэһилиэгин бастакы нүөмэрдээх оскуолатын саха тылын уонна литературатын учуутала Лариса Данилова кыайыылааҕынан таҕыста. Лариса Дмитриевна уруоктарын таһынан Хоһоон хонуута диэн куруһуогу салайар. Манна кини оҕолору ийэ тылларын үөрэтиигэ хоһоонтон театр кэрэ эйгэтигэр уһуйар.
Лариса Данилова, "Төрөөбүт тыл уонна литература бастыҥ учуутала" СӨ күрэх кыайыылааҕа: «Маннык күрэстэр ыытылаллара олус наадалаах дии саныыбын. Биһиги төрөөбүт тылбытыгар болҕомто уураннар сылын аайы ыытыллар буолбутуттан үөрдүм. Уопут атастаһыыта, бэйэҕэр элбэх билиини ылынан уонна бэйэн үлэҕин көрдөрөргө олус табыгастаах дии саныыбын».
Лариса Данилова аны күһүн Саха сирин чиэһин бүтүн дойду күрэҕэр Татарстанна тиийэн көмүскүөҕэ. Бэлиэтээн эттэххэ, ааспыт сыллааҕы кыайыылаах Горнай улууһуттан Кэскилээнэ Лукина дойду таһымыгар алта бастыҥ учуутал иһигэр киирсэн турар. Онон быйылгы кыайыылаах эмиэ ситиһиилээхтик кыттыа диэн эрэнэбит.