Оҕолорго үбү-харчыны сатаан туһаныы туһунан комикс оҥоһуллан таҕыста

Белла уонна Проша диэн ааттаах тииҥчээннэр үп-харчы эйгэтигэр мүччүргэннээх сырыыларын көрдөрөр ойуулук нэһилиэнньэ кырачаан араҥатыгар киэҥ биһирэбили ылбыта. Харчыны табыгастаахтык туһаныы үөрүйэҕэр уһуйар мультик аны билигин кумаахыга тиһиллэн комикс буолан таҕыста. Сүҥкэн улахан үлэни Николай Денисович Неустроев аатынан Смарт-библиотека үлэһиттэрэ оҥордулар.

Розалия Ксенофонтова, "Финансовая грамотность" онлайн-оскуола бырайыак ааптара: «Дойдубут үрдүнэн үбү-харчыны сөпкө туһаныы таһымын үрдэтиигэ араас бырайыактар бааллар. Ол чэрчитинэн биһиги библиотекабыт улахан үлэни ыытар. Оҕолору да, улахан да дьону кытта үлэлэһэбит. Онтон бу саҥа бырайыакпыт ойуулугун көрөн,кинигэтин ааҕан оҕолор харчыны сөпкө туттар буолаллар, бэйэлэригэр сыал-сорук туруоруналлар».

Аан маҥнайгы ойуулук 2021 сыллаахха тахсыбыта онтон ыла 10 серия нууччалыы-сахалыы тылынан таҥыллан куйаар ситимигэр көрөөччү киэҥ эйгэтигэр турар. Онтон саҥардыы тахсыбыт комикс туһа туспа.

Дария Фёдорова, сценарий ааптара: «Дьиэ кэргэн курдук уруһуйдаан көрдөрбүппүт. Ийэлээх аҕалара оҕолорун кыра эрдэхтэриттэн харчыны сатаан туһанарга үөрэтэллэрин курдук. Кинигэни оонньуу халыыптаах оҥордубут».

Кинигэ уопсайа 48 сирэйдээх. Комиксы 5 ый устата уруһуйдаабыттар. Дьоруойдар анимация ситимин 2Д анимациятынан оҥоһуллубут.

Күннэй Борисова, уруһуй ааптара: «Бырайыакпытын балаҕан ыйыттан саҕалаан оҥорбуппут. Комикспыт 48 сирэйдээх уонна 10 сериялаах».

Комиксы билиһиннэрии кэмигэр Дьокуускай куорат уһуйааннарыгар, оскуолаларыгар бэлэх ууннулар. Аны сотору кэминэн Сахабыт сирин бары үөрэх тэрилтэлэригэр ыыталыахтара. Итиэннэ саҥардыы тахсыбыт комиксы Дьокуускай куорат библиотекаларыгар көрүөххүтүн сөп.