Хоту аһы – үөлү тириэрдии түмүктүүр түһүмэххэ тиийдэ

Кыһынны суоллары баттаһа былдьаһыктаах куннэр. Сайынын суол суох кэмигэр булгуччулаах аһы-үөлү, туттар малы-салы уу суолунан эбэтэр салгынынан ыыталлар. Онтон кыһынын суол туран турар кэмнэригэр сүрүн табаар ахсаанын ыытарга дьулуһаллар. Арктикатааҕы атыы уонна логистика тэрилтэтэ уопсайа 241 нэһилиэнньэлээх пууҥҥа продовольственнай табаары тиэрдэр соруктаах.

Анна Григорьева, Арктикатааҕы атыы уонна логистика тэрилтэтин салайааччытын солбуйааччыта: «Быйыл кыһыҥҥы суолунан уопсай былааммыт 5700 туонна кэриҥэ табаар. Бу күҥҥэ 78,5% толорон олоробут. Муус суоллар сабыллыахтарыгар диэри биир ый хаалла. Ол кэмҥэ улуус иһигэр тиэйиини түмүктүөхпүт».

Хас биирдии оройуон олохтоохторун аска-үөлгэ, туттар малга-салга баҕа санаалара араас. Номнуо ыыппыт табаардарыттан тирэҕирэн анализ оҥорон куруук табаар ассортименнын аныгыс ыытыыга уларытан, эбэн-сабан биэрэллэр. Суол сабыллара ыйтан эрэ ордук кэм хаалан, кырыымчык бириэмэни баттаһан туох баар улуустарга күн өрөбүлэ суох рейстар оҥоһулла тураллар.

Алексей Шестаков, Арктикатааҕы атыы уонна логистика тэрилтэтин атыы-эргиэн салаатын салайааччыта: «Быйылгы былааммытын табаарбытын барытын туттубут. Барыта Дьокуускайга уонна Аллараа Бэстээххэ кэлэн турар. Онтон хоту илдьэр кээмэйбит сүүрбэччэ эрэ бырыһыан хаалла».

Эдьигээн улууһугар табаар    тиэрдилиннэ. Былаан туолара кыра хаалла.

Василий Сорокин, Эдьигээн улууһун баһылыга: «Атыы-эргиэн логистика киинэ арыллан кыһыҥҥы суолунан бордуукта эбии кэллэ. Сыаната да удамыр».

Былырыын уопсайа 600-тэн тахса массыына хоту уонна арктика сирдэригэр табаар тиэйбит эбит буоллаҕына, быйыл ити көрдөрүүттэн халсыбат ахсааннаах рейс оҥоһуллар.  Болдьохтон хаалыы суох.