Доруобуйаларыгар хааччахтаах оҕолор олорор усулуобуйаларын тэрийэр бастакы бырайыак түмүктэннэ

3 сыл устата аутизм уонна да атын диагностаах оҕолор «Ситим» бырайыакка холбоһон, бэйэни дьаһанарга, дьиэ ис-тас үлэтин баһылыырга үөрэннилэр. Олортон биирдэстэрэ 18 саастаах Андрей Тихонов. Кини төрөппүтэ Валентина Кириллина оҕо улаатан баран дьиэҕэ хааллан олорбокко, саастыылаахтарын кытта бииргэ толору сайдар кыахтаах диэн бары сыратын уурар. Андрей номнуо уруһуй, асчыт үлэтин баһылаан бэйэтин таптыыр идэтин булла.

Валентина Кириллина, төрөппүт: «Итэҕэһэ суох сананалларыгар олус улахан үктэли таҕыстылар. Ыллаабыт да оҕолору ылан көрдөххө, хайдахтаах курдук сайдалларын көрөн киһи үөрэр. Кинилэр билигин интэринээккэ олорор буолуохтарын сөп этэ, ону кинилэр билигин бэйэлэрин дьаһанар дьон буоллулар».

Бырайыакка уопсайа 37 оҕо кытынна. Олортон 12 интернаттан уонна 25 дьиэ кэргэнтэн. Төрөппүккэ өйөбүл буолан хас биирдии оҕоҕо анал бырагыраама оҥоһуллан ыытылынна.

Айталина Рехлясова, "Снигери" киин дириэктэрэ: «Кыра саастарыттан тиһигин быспакка дьарыктаннахха оҕо сайдар. Аутизнаах оҕолор тута үөрэммэттэр, ол иһин уһун кэмнээх дьарык ирдэнэр».

Психика өттүнэн кэһиллиилээх дьон олохторун тухары дьонтон туора сылдьыбакка, тэҥҥэ үүнэр-сайдар кыахтара үгүс. Санкт-Петербуурдааҕы инбэлиит оҕолор түмсүүлэрин сайыннарар киин дириэктэрэ бэлиэтээбитинэн, Саха өрөспүүбүлүкэтэ бырайыагы оройуттан ылан, түргэнник саҥа сүүрээни ылынан хамсаппыт бастыҥ регион буолар.

Мария Корякина, СӨ үлэ уонна социальнай сайдыы министиэристибэтин социальнай сайдыыга департаменын салайааччыта: «Бу бырайыагы биһиги түмүктээбэппит, кэҥэтэбит эрэ. Биһиги оҕолорбутун бэйэлэрэ дьаһанан олороллорун ситиһиэхтээхпит».

Арааһынай маастар кылаастар, дьаарбаҥка эгэлгэтэ ыытылынна. Төрөппүттэр оҕолоро туһунан дьаһанар буолбуттарын көрөн-истэн үөрүүлэрэ үксээтэ. Инникитин бу бырайыак үтүө түмүктээх буоларыгар экспертэри уонна төрөппүттэри кытта төгүрүк остуол ыытылынна. Оттон оҕолорго бу күн бэйэ кыаҕын арыйарга бастакы улахан хардыы буолла.